अयोध्या: गुरुवारी गंगा दशहराच्या मुहूर्तावर अयाध्येत उत्तर प्रदेशचे मुख्यमंत्री योगी आदित्यनाथ यांच्या उपस्थितीत आयोजित भव्य धार्मिक सोहळ्यात पहिल्या मजल्यावरील श्री राम दरबारसह आठ मंदिरांमध्ये विविध देवतांच्या मूर्तींची प्राणप्रतिष्ठा करण्यात आली. मुख्य दर्शनी भागातील शाही रूपातील ‘राजा राम’ मंदिरात प्राणप्रतिष्ठेचा मुख्य सोहळा झाला.
वैदिक मंत्रोच्चारात झालेले हे धार्मिक अनुष्ठान मंदिरात आयोजित दुसरा प्राणप्रतिष्ठा सोहळा होता. यापूर्वी २२ जानेवारी २०२४ रोजी पंतप्रधान नरेंद्र मोदी यांच्या उपस्थितीत मुख्य रामलल्लाच्या मूर्तीस अभिषेक करून प्राणप्रतिष्ठा करण्यात आली होती.
गुरुवारी अभिजित मुहूर्तावर या मंदिरांत प्राणप्रतिष्ठा करण्यात आली. सकाळी साडेसहा वाजता विविध देवतांच्या मूर्तींचा अभिषेक यज्ञ मंडपातील पूजेसोबत सुरू झाला. राम दरबाराची प्राणप्रतिष्ठा हा एक गौरवशाली आणि ऐतिहासिक प्रसंग आहे, असे पंतप्रधान नरेंद्र मोदी यांनी म्हटले आहे.
धार्मिक गुरू व वैदिक परंपरांनुसार विधी
श्री रामजन्मभूमी तीर्थक्षेत्र ट्रस्टचे सदस्य अनिल मिश्रा यांच्यानुसार, हा समारंभ वैदिक परंपरेनुसार संपन्न झाला. या वेळी स्थानिक लोक आणि भाविकांच्या रांगा लागल्या होत्या. या पार्श्वभूमीवर सुरक्षा बंदोबस्त वाढवण्यात आला होता.
असा होता सुरक्षा बंदोबस्त
अयोध्येत चारही दिशांना त्रिस्तरीय सुरक्षा होती. विशेष प्रशिक्षित सुरक्षा कर्मचाऱ्यांसह ड्रोनभेदी तंत्रज्ञान, सीसीटीव्ही तसेच अत्यंत प्रगत देखरेख प्रणाली या वेळी ठेवण्यात आली होती.
या देवतांची प्राणप्रतिष्ठा
मुख्य मंदिर परिसरातील नियोजित जागी केंद्रस्थानी श्री राम दरबार, शेषावतार, ईशान्येला भगवान शिव, आग्नेय दिशेस श्रीगणेश, दक्षिण भागात श्री हनुमान, दक्षिण-पश्चिमेला श्री सूर्यदेव, वायव्येला देवी भगवती आणि उत्तरेला देवी अन्नपूर्णा अशा देवी-देवतांची प्राणप्रतिष्ठा करण्यात आली.