लखनौमध्ये एक मोठी दुर्घटना घडली. येथे मवैया येथे घराचं छत कोसळून एकाच कुटुंबातील पाच जणांना आपला जीव गमवावा लागल्याची धक्कादायक घटना घडली आहे. रेल्वे कॉलनीत असलेल्या घराचं छत कोसळल्याने कुटुंबातील सदस्यांचा मृत्यू झाल्याचं सांगण्यात येत आहे. दुर्घटनेची माहिती मिळताच एसडीआरएफचे पथक घटनास्थळी पोहोचले.
मिळालेल्या माहितीनुसार, या मोठ्या दुर्घटनेत 5 जणांना आपला जीव गमवावा लागल्याचं समोर आलं आहे, त्यात 3 मुलं आणि पती-पत्नीचा समावेश आहे. सध्या घटनास्थळी मदत आणि बचावकार्य सुरू आहे. मृत्युमुखी पडलेल्यांमध्ये 40 वर्षीय सतीश चंद्र, 35 वर्षीय सरोजिनी देवी, 13 वर्षीय हर्षित, 10 वर्षीय हर्षिता आणि 5 वर्षीय अंश यांचा समावेश आहे.
मुख्यमंत्र्यांनी घेतली दखल
राज्याचे मुख्यमंत्री योगी आदित्यनाथ यांनीही लखनौमधील घटनेची दखल घेतली आहे. सीएम योगी यांनी अधिकार्यांना तातडीने घटनास्थळी पोहोचून मदतकार्य वेगाने करण्याच्या सूचना दिल्या आहेत. याशिवाय जखमींवर योग्य उपचार करण्याच्या सूचनाही मुख्यमंत्र्यांनी दिल्या आहेत.
लहान मुलांसह पाच जणांनी गमावला जीव
लखनौमधील जुन्या रेल्वे कॉलनीत हे घर आहे. आलमबागच्या मवैय्या येथील आनंद नगर फतेह अली चौकाच्या बाजूला बांधलेल्या या वसाहतीतील घरावर छत कोसळण्याची दुर्घटना घडली असून त्यात लहान मुलांसह पाच जणांना आपला जीव गमवावा लागला आहे. एका हिंदी वेबसाईटने याबाबतचे वृत्त दिले आहे.