बदलापूर - ट्रेलर चालकाने ओव्हरटेक करताना गाडीस दाबल्याने स्कुटीवरून पडून ट्रेलरच्या चाकाखाली आल्याने रिया शर्मा (२०) या तरुणीचा मृत्यू झाल्याची घटना बदलापूरात घडली आहे. शनिवारी (ता.१) संध्याकाळी ७ वाजताच्या सुमारास बदलापूर पूर्वेकडील खरवई नाका परिसरात हा अपघात झाला. शिरगाव आपटेवाडी परिसरात राहणारी रिद्धी साठे (२२) ही तरुणी ऍक्टिव्हा स्कुटीवरून खरवई नाका येथे जात असताना सीएनजी पंपाजवळ पाठीमागून भरधाव वेगाने एक ट्रेलर आला.
ट्रेलर चालकाने वाहतुकीच्या नियमांकडे दुर्लक्ष करून उजव्या बाजूने ओव्हरटेक करताना गाडी दाबल्याने रिद्धी व तिच्या सोबत स्कुटीवर बसलेली रिया शर्मा तोल जाऊन खाली पडली. त्यावेळी ट्रेलरच्या डाव्या चाकाचा मार रिया शर्माच्या डोक्याला लागून मोठ्या प्रमाणात रक्तस्राव होऊन तिचा मृत्यू झाला. तर रिद्धी साठे हिच्या उजव्या हाताला दुखापत झाली. दरम्यान, याप्रकरणी बदलापूर पूर्व पोलीस ठाण्यात ट्रेलर चालक अब्दुला खान (४२) याच्याविरोधात गुन्हा दाखल करण्यात आला असून सपोनि एच एम कुलकर्णी अधिक तपास करीत आहेत.