कल्याण : कल्याण शहर परिसरातील असमान रस्ते आणि खड्ड्यांमुळे आतापर्यंत पाच जणांचा नाहक बळी गेलेला असतानाच खड्ड्यांमुळे आणखी एक अपघात घडला आहे. कल्याण पूर्वेकडील नेतीवली चौक परिसरात पडलेल्या खड्ड्यात गाडी घसरून हा अपघात झाला. या अपघातात एक शिक्षिका आणि तिच्या मुलीला गंभीर दुखापत झाली आहे.
कल्याणच्या रामबाग परिसरात राहणाऱ्या शिक्षिका भारती नरे या त्यांची मुलगी सिद्धी हिला नांदीवली परिसरात असणाऱ्या शाळेतून घेऊन घरी परतत होत्या. बुधवारी ( 18 जुलै) दुपारी 4.15 वाजण्याच्या सुमारास नेतीवली चौकातून जात असताना रस्त्यावर पडलेल्या खड्ड्यामुळे त्यांच्या अॅक्टिव्हा गाडीला अपघात झाला. यामुळे भारती आणि सिद्धी या दोघीही जखमी झाल्या आहेत. रस्त्यावरील खड्ड्यात टाकलेल्या खडीमुळे गाडी घसरल्याची माहिती भारती यांचे पती चेतन नरे यांनी दिली. या अपघातात भारती यांच्या हाताला गंभीर दुखापत झाली असून प्लॅस्टर घालण्यात आले आहे. तर सिद्धीलाही बऱ्यापैकी मुका मार बसल्याचे त्यांनी सांगितले. तसेच आणखी कोणाचा जीव जाण्याच्या आत या मार्गावरील खड्डे दुरूस्त करण्याची मागणी चेतन यांनी केली आहे.