मीरारोड - भाईंदर पूर्वेस रेल्वे स्थानका समोरील रेल व्हू इमारतीच्या गाळ्यात लोटस ऑनलाईन लॉटरी आणि झटपट लॉटरी नावाने जुगार चालवला जात असल्या प्रकरणी नवघर पोलिसांनी दोघांना ताब्यात घेतले .
सदर इमारतीच्या गाळ्यात लॉटरीच्या नावाखाली जुगार चालवला जात असल्याची माहिती उपनिरीक्षक युवराज चौधरी यांना मिळाल्यावर सोमवारी त्यांनी पोलीस पथकासह छापा टाकला . त्याठिकाणी लोटस ऑनलाईन लॉटरी व झटपट लॉटरी नावाने बेकायदेशीर जुगार खेळवला जात होता.
रोखीसह जुगाराचे साहित्य पोलिसांनी जप्त केले. जुगार खेळवणाऱ्या भैरूलाल पटेल (२२) रा. कासारवडवली, ठाणे व नरेंद्रकुमार पटेल (३८) रा. काशीमीरा ह्या दोघांना ताब्यात घेऊन त्यांच्यावर गुन्हा दाखल करण्यात आला आहे.