ठाणे, दि. २१ - ठाणे येथील ब्रह्मांड भागात रिक्षातून प्रवास करणाऱ्या युवतीला वाहतूक पोलिसांच्या टोईंग वाहनवरील खासगी कर्मचाऱ्यांनी अश्लील हावभाव करत लोखंडी दांड्याने मारहाण केल्याची धक्कादायक घटना सोमवारी सायंकाळी घडली. याप्रकरणी कापूरबावडी पोलिसांनी तिघांना ताब्यात घेतले असून त्यांची चौकशी करीत आहेत. विशेष म्हणजे, टोईंग वाहनवर कार्यरत असलेल्या वाहतूक पोलीस कर्मचाऱ्यादेखतच हा प्रकार घडत असतानाही त्यांनी खासगी कर्मचाऱ्यांना रोखण्याचा प्रयत्न केला नसल्याचा दावा पीडित युवतीच्या पालकांनी पत्रकारांशी बोलताना केला.
ठाणे येथील वसंतविहार भागात पिडीत 21 वर्षीय युवती राहते. ती मानपाडा परिसरात म्युजिक क्लासेसमध्ये शिकवते. सोमवारी सायंकाळी ती रिक्षातून घरी परतत होती. ब्रह्मांड परिसरातील सिग्नलजवळ रिक्षा थांबली असता तिच्या बाजूला असलेल्या वाहतूक पोलिसांच्या टोईंग वाहनातील खासगी कर्मचारी पीडित युवतीकडे पाहून अश्लील हावभाव करीत होती. त्याचा जाब रिक्षाचालकाने विचारताच त्या कर्मचाऱ्यांनी त्याला मारहाण केली आणि त्या पीडित तरुणीलाही त्यांनी लोखंडी दांड्याने मारहाण केली. या घटनेनंतर त्या कर्मचाऱ्यांनी तेथून पळ काढला. दरम्यान पीडित युवतीने कापूरबावडी पोलीस ठाण्यात धाव घेतल्यानंतर पोलिसांनी त्या तिघांना ताब्यात घेतले, अशी माहिती पोलीस सूत्रांनी दिली.