ठाणे : कंटेनर चालकाचा वाहनावरील ताबा सुटल्याने या कंटेनरने घोडबंदर रोडवरून ठाण्याकडे येणाऱ्या रोडवरील ट्रकला जोरदार धडक दिली. ट्रक घोडबंदर रोडवर उलटून ट्रकमधील तेल रस्त्यावर सांडले आहे. त्यामुळे या मार्गावरील वाहतूक काहीवेळ विस्कळीत झाली होती. गुरुवारी सकाळी साडेसहा वाजण्याच्या सुमारास वाघबीळ पुलाजवळ हा अपघात घडला.
कंटनेर चालक राजेंद्र सावंत हे घोडबंदर रोडने जात असताना, वाघबीळ पुलाजवळ त्यांचा कंटेनरवरील नियंत्रण हरवले. त्यामुळे तो कंटेनर घोडबंदर रोडवरून ठाण्याकडे जाणाऱ्या रोडवरील ट्रकला जाऊन धडकला. ही धडक जोरदार असल्याने ट्रक घोडबंदर रोडवर मधोमध उलटला. ट्रकमधील तेल रस्त्यावर सांडल्याने ठाण्याकडे येणारी वाहतूक थांबविण्यात आली. या घटनेची माहिती मिळताच कासारवडवली वाहतूक पोलिसांसह अग्निशमन दलाने घटनास्थळी धाव घेतली. यावेळी किरकोळ जखमी झालेला ट्रक चालक सिद्धेश्वर गिरी याला खासगी रुग्णालयात दाखल केले. हायड्रा मशीनच्या सहाय्याने अपघातग्रस्त ट्रकला रस्त्याच्या बाजूला करण्यात आला. तसेच अग्निशमन दलाच्या मदतीने रस्त्यावर सांडलेल्या तेलावर पाण्याचा मारा करून माती पसरविण्यात आली. त्यानंतर घोडबंदर-ठाणे रोड वाहतुकीसाठी मोकळा करण्यात आला.
दरम्यान, साधारणत: पाऊण ते एक तासातानंतर वाहतूक पूर्वपदावर आल्याची माहिती कासारवडवली वाहतूक उपशाखेचे पोलीस निरीक्षक संदीप सावंत यांनी दिली.