अंबरनाथ : अंबरनाथ नगर पालिकेच्या सार्वत्रिक निवडणुकीच्या अनुषंगाने मतदार याद्या तयार करण्यात आल्या असून या मतदार यादीमध्ये प्रचंड प्रमाणात गोंधळ घालण्यात आल्याचा आरोप सर्वच पक्ष करीत आहे. त्यातच रिपाईचे माजी शहराध्यक्ष अजय जाधव यांनी थेट तहसिलदार आणि नायब तहसीलदारांना गोळ्या घालण्याची धमकी दिल्याने खळबळ उडाली आहे अंबरनाथ नगरपालिकेची मतदार यादी तयार करण्यासाठी विधानसभेच्या भाग क्रमांक प्रमाणे यादी फोडून मतदारांचा प्रभाग निहाय समावेश करण्यात आला आहे. मात्र हे करताना संबंधीत पालिकेच्या अधिकाऱ्यांन मार्फत आणि यादी तयार करणाऱ्या कर्मचाऱ्यांना मार्फत मोठ्या प्रमाणात मतदारांचे का प्रभागातून दुसर्या प्रभागात स्थलांतर केल्याचे समोर आले आहे.
विधानसभेच्या यादीमध्ये मोठ्या प्रमाणात बोगस नावांचा समावेश करण्यात आल्याने त्याचा देखील त्रास राजकीय पक्षांना होत आहे. बोगस नावे पालिका निवडणुकीत काढणे शक्य नसल्याने त्याच आधारावर निवडणुका घेतल्या जाणार असल्याने सर्व राजकीय पक्ष एकमेकांवर आरोप करीत बोगस मतदार संदर्भात आपला आक्षेप नोंदवत आहेत. एवढेच नव्हे तर अनेक मतदार यादी तयार करताना एका प्रभागातील नावे थेट दुसरा प्रभागात टाकून संबंधित कर्मचाऱ्याने आपली जबाबदारी झटकण्याचे काम केले आहे. पालिकेची यादी तयार करताना कर्मचाऱ्यांचा चुकीचा भूर्दंड हा थेट निवडणूक लढविणाऱ्या उमेदवारांना बसणार असल्याने आता इच्छुक उमेदवार आपापल्या स्तरावर संताप व्यक्त करताना दिसत आहे. यादीतील गोंधळाला नेमका जबाबदार कोण याचा शोध घेतला जात असतानाच रिपब्लिकन पार्टी ऑफ इंडिया आठवले गटाचे माजी शहराध्यक्ष अजय जाधव यांनी थेट या मतदार यादीतील गोंधळाला तहसीलदार आणि नायब तहसीलदार यांना जबाबदार धरीत त्यांना मतदार यादीतील गोंधळ न सोडवल्यास थेट गोळ्या घालण्याची धमकी दिली आहे. यासंदर्भात संतापजनक व्हिडिओ जाधव यांनी सोशल मीडियावर प्रसारित केला आहे. त्यांच्या या धमकीमुळे निवडणुकीचे वातावरण गढूळ होत असल्याचे दिसत आहे.
'' अजय जाधव यांच्या व्हिडिओ वरून त्याच्या विरोधात पोलिसांकडे तक्रार केली आहे पुढील कारवाई पोलीस प्रशासनामार्फत केली जाईल. - तहसीलदार जयराज देशमुख