सदानंद नाईक -
उल्हासनगर : महापालिका महापौर निवडणुकीत पक्षाच्या व्हीपचे उल्लंघन करणाऱ्यां ओमी कलानी टीम समर्थक ९ नगरसेवकांवर नगरसेवक पद रद्द होण्याही टांगती तलवार उभी ठाकली आहे. न्यायालयाच्या आदेशानुसार २४ ऑगस्ट रोजी कोकण विभागीय आयुक्तांकडे याप्रकारणी सुनावणी होणार असल्याची माहिती भाजपचे अध्यक्ष जमनुदास पुरस्वानी यांनी दिली.
उल्हासनगर महापालिका महापौर पदाची निवडणूक नोव्हेंबर २०१९मध्ये पार पडली. भाजपतील ओमी कलानी समर्थक ९ नगरसेवकांनी व्हीपचे उल्लंघन करून पक्षाच्या उमेदवारीऐवजी शिवसेनेच्या लिलाबाई अशान यांना मतदान केल्याने, त्या महापौर पदी निवडून आल्या. याविरोधात भाजपने कोकण विभागीय आयुक्तांकडे दाद मागून नगरसेवक पद रद्द करण्याची मागणी केली.
दरम्यान, प्रकरण उच्च न्यायालयात गेल्यावर न्यायालयाने कोकण विभागीय आयुक्तांना ३० नोव्हेंबर पूर्वी निर्णय घेण्याचा आदेश दिला. तसेच २४ ऑगस्ट रोजी विभागीय आयुक्तांनी सुनावणी ठेवल्याची माहिती भाजपचे गटनेते व शहर जिल्हाध्यक्ष जमनुदास पुरस्वानी यांनी दिली. याप्रकारने ओमी टीम समर्थक नगरसेवकात खळबळ उडाली असून नगरसेवक या प्रक्रियेतून सहीसलामत बाहेर पडणार असल्याची प्रतिक्रिया ओमी कलानी यांनी दिली.
महापालिका महापौर निवडणुकीत पक्षाच्या व्हीपचे उल्लंघन करणाऱ्या ओमी कलानी टीम समर्थक ९ नगरसेवकांवर टांगती तलवार लटकत असताना, भाजपाने प्रभाग व विशेष समिती सभापती पदाच्या निवडणुकीत पक्षाच्या व्हीपचे उल्लंघन करणाऱ्या १२ नगरसेवकांवरही कारवाई करण्याची मागणी कोकण विभागीय आयुक्तांकडे केली. यामध्ये भाजपातील ओमी कलानी टीम व जीवन इदनानी समर्थक १२ नगरसेवकांचा समावेश आहे. महापौर निवडणुकीपूर्वी साई पक्षाचे बहुतांश नगरसेवक अधिकृतपणे भाजपत सामील झाले होते. तशी कोकण विभागीय आयुक्तांकडे नोंद आहे. साई पक्ष येणाऱ्या महापालिका निवडणुकीत स्वतंत्रपणे निवडणूक लढण्याच्या तयारीत आहे. तसे संकेत साई पक्षाच्या नगरसेवक आशा इदनानी यांनी दिले.
पक्षाच्या व्हीपचे उल्लंघन करणाऱ्या नगरसेवकांवर कारवाई हवीच - जमनुदास पुरस्वानी
महापालिका निवडणुकीत भाजप विकास आघाडीला नागरिकांनी स्पष्ट बहुमत देऊन पक्षाच्या मीना आयलानी महापौर पदी निवडून आल्या. मात्र अडीच वर्षानंतर महापौर निवडणुकीत पक्षाच्या ९ नगरसेवकांनी पक्ष्याच्या व्हीपचे उल्लंघन करून पक्षाच्या उमेदवाराऐवजी शिवसेनेच्या लिलाबाई अशान यांना मतदान करून महापौर पदी निवडून आणले. अशा नगरसेवकांचे नगरसेवक पद रद्द व्हायला हवे, असे मत भाजपचे गटनेते व शहारजिल्हाध्यकक्ष जमनुदास पुरस्वानी यांनी व्यक्त केले.