नितिन पंडीत
भिवंडीतील रस्त्यांवर पडलेल्या खड्ड्यामध्ये दुचाकी आदळल्याने झालेल्या अपघातात दुचाकीवरील इसमाचा जागीच मृत्यू झाल्याची दुर्दैवी घटना शनिवारी रांजणोली नाका येथील टाटा आमंत्रा येथे घडली आहे. या अपघाताप्रकरणी अज्ञात डंपर चालका विरोधात कोनगाव पोलीस ठाण्यात गुन्हा दाखल करण्यात आला आहे.
ब्रिजेशकुमार जैसवार उर्फ मुनी काका असे अपघातात मृत्यू झालेल्या इसमाचे नाव असून ते राम जनकराम सहाय शर्मा वय २२ वर्ष रा. उल्हासनगर याच्या सोबत दुचाकीवरून प्रवास करत होते.ते भिवंडीतील मुंबई-नाशिक हायवेवरील टाटा आमंत्रा सोसायटीचे गेट समोर रांजणोली नाका येथे आले असता वाहतूक कोंडीमुळे या ठिकाणी वाहने हळुहळु सुरु असल्याने राम याने त्याची मोटार सायकल हायवे रोडच्या खाली घेवुन चालवित असताना अचानक त्यांची मोटार सायकल एका खड्ड्यात गेल्याने त्यांच्या दोघांचा मोटार सायकल वरून तोल जावुन दोघेही खाली पडले याच वेळी पाठीमागून आलेल्या एका डंपरचे पाठी मागील डावे बाजूचे चाक ब्रिजेश कुमार यांच्या छाती व गळयावरून गेल्याने त्यांचा जागीच मृत्यू झाला.याप्रकरणी अज्ञात डंपर चालकाविरोधात कोनगाव पोलीस ठाण्यात गुन्हा दाखल करण्यात आला आहे.