कल्याण : महाविद्यालयीन विद्यार्थ्यांना घेऊन जाणारी खासगी ट्रॅव्हल्सची बस उलटल्याची घटना रविवारी रात्री 9 च्या सुमारास दुर्गाडी पुलावर घडली. एका अज्ञात वाहनाने बसला कट मारल्याने चालकाचे बसवरील नियंत्रण सुटले आणि बस उलटल्याची प्राथमिक माहिती आहे.
वज्रेश्वरीला सहलीसाठी गेलेल्या अंबरनाथमधील महाविद्यालयीन विद्यार्थ्यांची ही बस असल्याचे समजते. या बसमध्ये सुमारे 25 विद्यार्थी होते. त्यापैकी 2 जणांना किरकोळ दुखापत झाल्याचे घटनास्थळी उपस्थित असलेल्या प्रत्यक्षदर्शीनी सांगितले. अपघात घडताच पोलीस आणि स्थानिकांनी आतल्या विद्यार्थ्यांना बाहेर काढले. सुदैवाने बसचा वेग कमी असल्याने मोठा अपघात टळल्याचे बाजारपेठ पोलिसांनी सांगितले. दरम्यान, या अपघातामुळे कोनकडून कल्याणकडे येणाऱ्या मार्गावर आणि दुर्गाडी चौकात मोठी वाहतूक कोंडी झाली होती. मात्र स्थानिक पोलीस आणि वाहतूक पोलिसांनी तातडीने घटनास्थळी धाव घेत क्रेनच्या सहाय्याने बस बाजूला करून रस्ता मोकळा केला.