मीरारोड - मीरारोडच्या शांती पार्क , गोकुळ व्हिलेज मधील रहिवाश्यांच्या हक्काच्या आरजी जागेत कम्युनिटी हॉलच्या आड झालेल्या धार्मिक स्थळां मधील बेकायदा बांधकामाचा भाग तोडण्याच्या कारवाई दरम्यान त्याला धार्मिक वळण देत जमावाने सरकारी कामात अडथळा आणला . तसेच पोलिसांना धक्काबुक्की करत महिला वरिष्ठ पोलीस निरीक्षक यांना काठीने मारहाण केली . या प्रकरणी पोलिसांनी गुन्हा दाखल केला आहे.
गोकुळ व्हिलेज मध्ये मोठा आरजी भूखंड हा रहिवाश्यांचा हक्काचा असताना त्यात विविध अतिक्रमण आणि बांधकामे झाली आहेत . तर आरजी जागेत कम्युनिटी हॉल बांधता येत असला तरी ये ठिकाणी दोन संस्थांनी बांधकामे करून त्याचा हॉल भाड्याने देणे तसेच धार्मिक स्थळ म्हणून वापर चालवला आहे . रहिवाश्यांच्या हक्काचा आरजी भूखंड असताना त्यांनाच येथे येण्यास बंदी होती . त्यामुळे मुलांना खेळण्यास जागा नाही व रहिवाश्याना विरंगुळा , व्यायाम आदी पासून मुकावे लागले.
गोकुळ शांती वेल्फेअर असोसिएशन ह्या रहिवाश्यांच्या संघटनेने या प्रकरणी महापालिके पासून शासना कडे सातत्याने तक्रारी करत आरजीचा भूखंड मोकळा करून द्यावा . अतिक्रमण हटवावे अशी मागणी चालवली होती . पालिकेने देखील पूर्वीच येथील बरेच बांधकाम वाढीव आणि अनधिकृत ठरवून देखील त्यावर कारवाई मात्र केली जात नव्हती . काही राजकीय मंडळी देखील कारवाई होऊ नये म्हणून दबाव टाकत होते.
मुंबई उच्च न्यायालयाने देखील रहिवाश्यांच्या याचिकेवर पालिकेला फटकारत कारवाईचे आदेश दिले होते . त्या नंतर विकासक व बेकायदा बांधकाम करणाऱ्या संस्था यांनी स्वतःहून वाढीव बांधकाम तोडणे सुरु केले होते . परंतु थोडेफार तोडून बाकी तोडण्यास टाळाटाळ सुरु झाली.
अखेर महापालिकेने शुक्रवारी मोठ्या पोलीस बंदोबस्तात बेकायदा बांधकाम तोडण्यास घेतले . कारवाईच्या वेळी काही संघटना व पक्षाच्या लोकांनी विरोध दर्शवत घोषणाबाजी केली . कारवाईचा जेसीबी अडवण्यात आल्याने पोलिसांनी त्यांची समजूत घालण्याचा प्रयत्न केला असता जमावाने पोलिसांशी धक्काबुक्की सुरु केली . त्यात वरिष्ठ पोलीस निरीक्षक मेघना बुरांडे यांच्या डोक्यात काठीने मारहाण केली गेली.
पोलिसांनी जमावाला पिटाळून लावत काहींना ताब्यात घेतले . मीरारोड पोलीस ठाण्यात काही संघटनांच्या कार्यकर्त्यांसह ९ ते १४ जणांवर गुन्हा दाखल करण्यात आला आहे . दरम्यान पालिकेने एका हॉल - धार्मिक स्थळातील २ खोल्या , २ बाथरूम व १ जिना तोडला . तर दुसऱ्या हॉल - धार्मिक स्थळ येथील २ बाथरूम , १ खोली व १ जिना बेकायदा असल्याने पाडण्यात आला . तर काही अनधिकृत बांधकाम संबंधित विकासक व संस्था यांना काढून घेण्याचे पालिकेने सांगितले आहे.
आरजी जागा ह्या फ्लॅट विकत घेणाऱ्या रहिवाश्यांच्या हक्क व मालकीच्या असतात . मात्र संगनमताने रहिवाश्यांच्या जागा बळकावण्यात आल्याने हक्कासाठीचा हा लढा आहे . आरजी जागा रहिवाश्याना मिळवून देणे शासन - पालिकेचे कर्तव्य आहे असे रहिवाशी म्हणाले.
रहिवाश्यांच्या जागेत बळजबरी करून बेकायदा बांधकामाच्या संरक्षणा साठी त्याला धार्मिक स्थळे दाखवली गेली . कारवाई वरून त्याचा धार्मिक मुद्दा करणाऱ्यांनी आधी स्वतःच्या मालकी जागेत धार्मिक स्थळे उभारून द्यावीत असा सल्ला देखील येथील काही रहिवाश्यांनी विरोधकांना दिला आहे .