मीरारोड - मीरारोडच्या क्वीन्स पार्क भागात पुतण्याने काकीवर चाकूने सपासप वार करून हत्या केल्याची घटना मंगळवारी घडली आहे . नवघर पोलिसांनी आरोपीला तासा भरात अटक केली आहे .
क्वीन्स पार्क भागात क्वीन्स ऍव्हेन्यू इमारतीच्या दुसऱ्या मजल्यावर शबाना खान ( ३१ ) यांची राहत्या घरात त्यांचा पुतण्या दिशान खान ( २० ) ह्याने मंगळवारी दुपारी चाकूने गळा, पोट आदी भागावर वार करून निर्घृण हत्या केली. यावेळी शबाना यांचा ११ वर्षांचा मुलगा घरीच होता .
सहायक पोलीस आयुक्त उमेश माने - पाटील यांनी दिलेल्या माहितीनुसार, दुपारी दिड ते दोनच्या सुमारास हि घटना घडली . शबाना यांच्यावर वार करून दिशान हा पळून गेला होता . मात्र पोलिसांनी त्याला शोधून अटक केली . हत्येचे नेमके कारण अजून स्पष्ट झाले नसून पोलीस तपासात कळेल असे ते म्हणाले .
सूत्रांनी दिलेल्या माहिती नुसार शबाना ह्या इमारतीतील एका विंगच्या दुसऱ्या मजल्यावर तर दिशान हा लगतच्या विंग मधील चौथ्या मजल्यावर भाड्याने राहतो . दिशान हा भाईंदर पश्चिम येथील एका खाजगी कंपनीत काम करतो . त्याचे शबाना व कुटुंब सोबत कौटुंबिक करणातून वादविवाद होत होते . त्याच रागातून मंगळवारी दुपारी दिशान ह्याने शबाना यांच्या घरी जाऊन तिच्या ११ वर्षांच्या मुलावर चाकू टेकवला . ते पाहून शबाना मुलास वाचवण्यासाठी धावून गेल्या असता दोघां मध्ये झटापट होऊन चाकूने शबाना वर अनेक वार केले . त्या रक्ताच्या थारोळ्यात पडल्या नंतर दिशान हा तिकडून निघून गेला होता . ह्यात दिशान ला सुद्धा चाकू लागून जखम झाली आहे.
तिकडून दिशान हा पुन्हा कामाच्या ठिकाणी गेला. दरम्यान हत्येच्या घटने नंतर वरिष्ठ पोलिस निरीक्षक विजय पवार व पथकाने तपास करत तासा भरात आरोपीला अटक केली. दिशान ह्याच्या आईचे शबाना व कुटुंबा सोबतच्या भांडणाचा राग त्याला होता. रागाच्या भरात त्याने मध्यप्रदेश , ग्वाल्हेर येथील गावी आजोबांना सुद्धा जखमी केल्याचे सांगितले जाते.