The Mumbai-Gorakhpur express train dropped | मुंबई-गोरखपूर अंत्योदय एक्स्प्रेसचा डबा घसरला
मुंबई-गोरखपूर अंत्योदय एक्स्प्रेसचा डबा घसरला

श्याम धुमाळ 
कसारा : मुंबई-नाशिक रेल्वेमार्गावरील कसारा घाटात गुरुवारी पहाटे पावणेचार वाजता प्रवासी साखरझोपेत असताना मुंबईहून गोरखपूरला जाणाऱ्या अंत्योदय हमसफर गोरखपूर एक्स्प्रेसच्या एका डब्याचे चाक घसरले. सुदैवाने यात कुणीही जखमी झाले नाही. मात्र, यामुळे नाशिककडे जाणारी मध्य रेल्वेची वाहतूक विस्कळीत झाली. जर या एक्स्प्रेसच्या मुख्य इंजीनजवळील डबा घसरला असता, तर मोठा अपघात झाला असता. जवळपास ५०० फूट खोल दरीत एका डब्यापाठोपाठ सर्वच डबे कोसळून मोठा अनर्थ झाला असता. दरम्यान, रेल्वे प्रशासनाला या अपघाताबाबत माहिती विचारली असता, किरकोळ अपघात असल्याची माहिती दिली. पहाटे ४ पासून प्रवासी येथे अडकले असून रेल्वे प्रशासनाने कोणतीही सुविधा पुरवली नसल्याने प्रवाशांनी संताप व्यक्त केला आहे.
या घटनेची माहिती मिळताच शहापूरचे आपत्ती व्यवस्थापन सदस्य घटनास्थळी दाखल झाले, तर रेल्वे प्रशासनाच्या आपत्कालीन विभागाने तब्बल तीन तासांनंतर मदतकार्य सुरू केले. गुरुवारी पहाटे मुंबईहून गोरखपूरला जाणारी हमसफर एक्स्प्रेस कसारा सोडल्यानंतर घाटात असलेल्या ब्रिटिशकालीन भीमादोन पुलावर पहाटे साडेतीनच्या सुमारास वळणावर पुढच्या इंजीनपासून सतरावा डबा व मागच्या इंजीनपासून दुसरा डबा रुळांवरून घसरला. पुलावर काहीतरी होऊन मोठा आवाज आल्याचे चालकाच्या लक्षात येताच त्याने प्रसंंगावधान राखून गाडी थांबवली. यामुळे मोठी दुर्घटना टळली.
पहाटेपासून गाडी पुलावर उभी असल्याने प्रवासी भेदरलेल्या अवस्थेत होते. या वेळी रेल्वे प्रशासनाने डाउन मार्गावरून येणाºया सर्व गाड्या अपमार्गाने वळवल्या होत्या. गाडी पुलावरून बाजूला करण्याचे काम युद्धपातळीवर करण्यात आले.
ज्या वेळी डबा घसरला, त्या वेळी गाडीतील प्रवाशांना मोठा धक्का बसला. कोणी वरच्या सीटवरून तर कोणी खालच्या सीटवरून पडले. गाडीच्या आवाजामुळे लहान मुलांसह महिला मोठमोठ्याने रडत होत्या. अनेक प्रवाशांनी काय प्रकार झाला, हे बघण्यासाठी दरवाजाकडे धाव घेतली, तेव्हा आजूबाजूला दाट धुके व सुमारे ५०० फूट खोल दरी दिसल्याने प्रवाशांत घबराट पसरली. गाडीतील महिलांनी जागेवर बसून देवाचा धावा सुरू केला.
पहाटे साडेतीन ते ६ पर्यंत रेल्वेकडून प्रवाशांना कुठलीही मदत मिळाली नाही. अपघातग्रस्त प्रवाशांना एका विशेष गाडीने सकाळी साडेनऊ वाजता इगतपुरी रेल्वे स्थानकावर आणल्यानंतर रेल्वे प्रशासनाकडून प्रवाशांना चहा, बिस्किटे, पाणी, वडापाव देण्यात आले.
>पहाटे साखरझोपेत असताना अचानक मोठा आवाज आला. काही समजण्याअगोदरच गाडीतील दरवाजे आदळले, काचा फुटल्या. खडबडून उठलो तेव्हा गाडीत आरडाओरडा सुरू होता. मी दरवाजाजवळ धावत गेलो, तर समोर खोल दरी व आजूबाजूला दाट अंधार व धुके होते. पहाटे साडेतीन ते सकाळी ६ पर्यंत आमची रेल्वे प्रशासनाने कोणतीही दखल घेतली नाही.
- सुनील यादव,
प्रवासी, वडाळा
>रात्री ३च्या सुमारास कसारा सोडल्यावर पहाटे कसारा घाटात गाडी आली. माझी मुलगी एका बर्थवर झोपली होती, तर मी खालील बर्थवर. पहाटे घटना घडण्याअगोदर पाच मिनिटे मला जाग आली. मी उठून बॅगा व माझ्यासोबतच्या प्रवाशांकडे पाहिले व पुन्हा जागेवर झोपण्यासाठी आले असता अचानक जोराचा आवाज झाला. गाडीने अचानक ब्रेक लावल्याने काचा वगैरे फुटल्या. मी गाडीतील लहान मुले व महिलांना एकत्र केले. षुरु ष मंडळींनी दरवाजा बंद करत सर्वांना धीर दिला.
- प्रीती चव्हाण, प्रवासी, गोरखपूर
मुंबईहून निघालेल्या या गाडीची कारशेडमध्ये दुरु स्ती न झाल्याने रेल्वे प्रशासनाच्या हलगर्जीपणामुळे हा प्रसंग ओढवला. देवाच्या कृपेने आम्ही वाचलो.
- चंद्रभान रनवर, प्रवासी, नालासोपारा
>मदतकार्यात अडथळे
इगतपुरी रेल्वे स्थानकापासून १५ मिनिटांच्या अंतरावर हा अपघात घडला होता. परंतु, पहाटे ६ पर्यंत कोणतीही मदत रेल्वे प्रशासनाकडून प्रवाशांना झाली नाही. ज्या ठिकाणी दुर्घटना घडली, त्या ठिकाणी मदतकार्य करण्यासाठी खूप अडथळे येत होते. आजूबाजूला दरी असल्याने रेल्वे कर्मचारी साखळी पद्धतीने दुरुस्ती करत होते.
> इतर मेल, एक्सप्रेस, लोकलवर परिणाम
मुंबई : या घटनेमुळे इतर मेल, एक्स्प्रेसची सेवा काही काळ रखडली होती. त्यामुळे दोन्ही दिशेकडील जाणाºया मेल, एक्स्प्रेस आणि लोकल सेवेवर परिणाम झाला. मध्य रेल्वे प्रशासनाने या मार्गावरून विशेष गाड्या चालविल्या. गर्दी विभाजित करण्यासाठी गाडी क्रमांक १२११० पंचवटी एक्स्प्रेस, गाडी क्रमांक १२२६२ हावडा ते मुंबई, गाडी क्रमांक १२३२१ हावडा ते मुंबई या मेल, एक्स्प्रेसला डोंबिवली, दिवा, ठाणे, दादर येथे थांबा दिला गेला.


Web Title: The Mumbai-Gorakhpur express train dropped
Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.