ठाणे : ‘गुडविन ज्वेलर्स’चे व्यवस्थापकीय संचालक तसेच या फसवणुकीतील मुख्य आरोपी सुनीलकुमार आणि सुधीरकुमार अकराकरण यांच्या पोलीस कोठडीत ठाणे न्यायालयाने आणखी दोन दिवसांची वाढ केली आहे. त्यांच्या पोलीस कोठडीची मुदत मंगळवारी संपल्यानंतर ठाणे आर्थिक गुन्हे शाखेच्या मागणीनंतर ही वाढ केली.
ठाण्यातील नौपाडा, डोंबिवलीतील विष्णुनगर आणि अंबरनाथमधील शिवाजीनगर येथे ‘गुडविन ज्वेलर्स’च्या फसवणुकीची तक्रार दाखल होण्यापूर्वी अकराकरण बंधू पसार झाले होते. २६ आॅक्टोबर २०१९ रोजी त्यांच्याविरुद्ध गुन्हा दाखल झाल्यानंतर ते १३ डिसेंबर २०१९ रोजी ठाणे न्यायालयात Þशरण आले होते. त्यानंतर त्यांना अटक करून न्यायालयात हजर केल्यावर २४ डिसेंबरपर्यंत पोलीस कोठडीत ठेवण्याचे आदेश न्यायालयाने दिले.
ठाणे शहर पोलीस आयुक्तालयाच्या कार्यक्षेत्रामध्ये सुमारे १२०० गुंतवणूकदारांची त्यांनी २५ कोटीपेक्षा अधिक फसवणूक केली आहे. त्यांची केरळ, हैदराबादसह डोंबिवलीतील २६ मालमत्ता ठाणे पोलिसांनी जप्त केल्या. आणखी एक मालमत्ता, तसेच त्यांची केरळमध्ये पाच एकर जमीनही आढळली आहे. याशिवाय, त्यांनी फसवणूक केलेल्या गुंतवणूकदारांच्या तक्रारी रोज दाखल होत आहेत. या पार्श्वभूमीवर आरोपींना दिलेल्या पोलीस कोठडीदरम्यान तपास अधिकाऱ्यांनी चांगली माहिती काढून मालमत्ता जप्त केली. त्यामुळे पुढील तपासासाठी त्यांच्या कोठडीत वाढ करण्याची मागणी आर्थिक गुन्हे शाखेने २४ डिसेंबर रोजी ठाणे न्यायालयात केली. ती मान्य करून न्यायालयाने कोठडीत वाढ केली.