मीरारोड - आठ झाडांवर खिळे ठोकून जाहिरातीचे फलक लावणाऱ्या एका सिक्युरिटी कंपनी चालका विरोधात महापालीकेच्या फिर्यादी नंतर भाईंदर पोलीस ठाण्यात गुन्हा दाखल करण्यात आला आहे.
शहरातील बेकायदा बॅनर , जाहिरात फलक आदींवर नियंत्रण ठेवण्यासाठी पालिकेने महादेव बन्दीछोडे यांची नियुक्ती केली असून भाईंदर पश्चिमेस प्रभाग समिती क्र . २ च्या हद्दीत पालिकेच्या सार्वजनिक झाडांवर खिळे ठोकून जाहिरातीचे फलक लावले होते . आठ झाडांवर असे फलक लावले गेल्याचे आढळून आले. बन्दीछोडे यांनी प्रभाग अधिकारी गोविंद परब यांना या बाबतचा अहवाल दिला.
त्या अनुषंगाने जाहिरातदार भारत सिक्युरिटी ग्रुप चा रवी पांडे रा . एकॉर्ड , गोरेगाव पूर्व याच्या विरोधात नागरी झाडांचे जतन व संरक्षण तसेच मालमत्ता विरूपण अधिनियमा खाली गुन्हा दाखल करण्यास परब यांनी भाईंदर पोलीस ठाण्यात फिर्याद दिली . त्या नुसार हा गुन्हा दाखल झाला आहे.
शहरात सर्रासपणे झाडांच्या फांद्या तोडून वा झाडांना खिळे ठोकून , तार - दोरीने बांधून बेकायदा जाहिरात फलक लावले जातात तसेच विद्युत रोषणाई केली जात आहे . या मुळे झाडांना इजा होऊन पर्यावरणाचा ऱ्हास होत आहे . पण वृक्ष प्राधिकरण विभागाचे अधिकारी मात्र झाडांच्या होणाऱ्या ऱ्हासाकडे सातत्याने डोळेझाक करत असल्याने झाडांवर बेकायदा फलक , रोषणाई आदी करणाऱ्यांना मोकळं रान मिळालं आहे .