ठाणे: स्वत:च्याच १७ वर्षीय मुलीवर चाकूच्या धाकाने लैंगिक अत्याचार करण्याचा प्रयत्न पाचपाखाडीतील एका पित्याने केल्याचा प्रकार सोमवारी रात्री घडला. या झटापटीत तोच चाकू त्याच्या पोटाला लागल्यामुळे त्याला मुंबईतील सर जे. जे. रुग्णालयात दाखल उपचारासाठी दाखल करण्यात आल्याची माहिती नौपाडा पोलिसांनी दिली.
यातील आरोपी व्यसनाधीन असल्यामुळे त्याच्या जाचाला कंटाळून त्याची पत्नी त्याला सोडून गेली आहे. बारावीमध्ये शिकण-या या मुलीसोबत तो पाचपाखाडी परिसरात वास्तव्याला आहे. सोमवारी रात्री ती झोपेत असतांनाच त्याने तिच्याशी झटापट केली. नंतर त्याने अचानक चाकूच्या धाकावर तो तिच्याशी कुकर्म करण्याच्या प्रयत्नात होता. त्याचवेळी दोघांमध्ये झालेल्या झटापटीत वडीलांच्या हातातील चाकू तिने हिसकविण्याचा प्रयत्न केला. या धुमश्चक्रीत त्याच्या पोटाला चाकू लागल्यामुळे तो गंभीर जखमी झाला. पोटातील आतडेही बाहेर आल्यामुळे तिथे जमलेल्या रहिवाशांनी त्याला तातडीने सुरुवातीला जिल्हा शासकीय रुग्णालयात दाखल केले. प्रकृती गंभीर झाल्याने त्याला मुंबईच्या सर जे. जे. रुग्णालयात दाखल केले आहे. या मुलीने दिलेल्या तक्रारीवरुन पित्याविरुद्ध विनयभंगासह पॉस्को (लहान मुलांचे लैंगिक अपराधापासून संरक्षण कायदा) कायद्यांतर्गत मंगळवारी दुपारी ३ वाजण्याच्या सुमारास गुन्हा दाखल झाला आहे. ती अडीच वर्षांची असतांना तिची आई पतीपासून विभक्त झाली. नंतर तिने याच्याशी घटस्फोट घेऊन दुसरा विवाह केला. त्यामुळे घरी वडील आणि पिडीत मुलगी असे दोघेच वास्तव्याला होते. तिचे वडील तिच्यावर नेहमी संशय घेत असत. ती आपल्या मित्र मैत्रिणींबरोबर फिरायला गेल्यानंतरही तो तिच्यावर संशय घेऊन तिला शिवीगाळ करीत असे, असेही तिने आपल्या तक्रारीत म्हटले आहे. याप्रकरणी पोलीस उपनिरीक्षक तृप्ती खळदे या अधिक तपास करीत आहेत. त्याची प्रकृती सुधारताच त्याला अटक करण्यात येईल, असे वरीष्ठ पोलीस निरीक्षक चंद्रकांत जाधव यांनी सांगितले.