भिवंडी : आगरी, कोळीबांधवांसह लाखो भक्तांचे श्रद्धास्थान असणाऱ्या कार्ला येथील एकवीरा देवीच्या दर्शनासाठी अंगप्रदर्शन करणाऱ्या कपड्यांवर बंदी घालण्यात आली आहे. एकवीरा देवी व मंदिराचे पावित्र्य राखण्यासाठी ही बंदी घातली आहे. ड्रेसकोडसंदर्भातील नव्या नियमांची अंमलबजावणी ७ जुलैपासून करण्यात येणार असल्याची माहिती कार्ला एकवीरा आई ट्रस्टचे प्रमुख विश्वस्त खा. सुरेश म्हात्रे ऊर्फ बाळ्या मामा यांनी दिली. शुक्रवारी कार्ला येथे आई एकवीरा देवीच्या मंदिरात विश्वस्त मंडळाच्या बैठकीत ड्रेसकोडसंदर्भात हा ठराव मंजूर झाल्याचे त्यांनी सांगितले.
दर्शनासाठी काही भक्त अंगप्रदर्शन करणारे कपडे घालून येतात. त्यामुळे मंदिराचे पावित्र्य धोक्यात येत असल्याच्या तक्रारी आल्या होत्या.
कोणत्या कपड्यांना बंदी ? : शॉर्ट, मिनी स्कर्ट, वेस्टर्न कपडे, फाटक्या जीन्स, हाफ पँट व अंगप्रदर्शन करणाऱ्या कपड्यांवर बंदी घातली आहे.
कोणते कपडे घालावेत ? : महिला व मुलींनी
साडी, सलवार कुर्ता किंवा इतर भारतीय पारंपरिक कपडे घालावेत ज्याने पूर्ण अंग झाकलेले असावे. पुरुषांनी व मुलांनी धोतर, कुर्ता पायजमा, पँट शर्ट, टी-शर्ट व इतर पारंपरिक कपडे ज्याने पूर्ण अंग झाकलेले असावे.
वाद घालणाऱ्या कर्मचाऱ्यांनाही सूचना : दर्शन घेताना येथील कर्मचारी भक्तांवर आरडाओरड करतात. भक्तांशी वाद घालत असल्याच्या तक्रारीही होत्या. कर्मचाऱ्यांनी भक्तांशी वाद न घालण्याच्या सूचना देण्यात आल्याची माहिती त्यांनी दिली.