ठाणे : गेले काही दिवस अनेक निर्बंध लादूनही ठाणे, कल्याण, डोंबिवली येथील कोरोनाचे रुग्ण वाढण्याचे प्रमाण तसूभरही कमी झाले नाही. उलट वाढता वाढता वाढे अशा पद्धतीने कोरोनाचा विळखा अधिक घट्ट होत आहे. बुधवारी ठाण्यात कोरोनाचे ४९३ नवे रुग्ण आढळले, तर कल्याण-डोंबिवलीत ५९३ नवे रुग्ण आढळले. यामुळे केवळ या तीन शहरांमधील रुग्णांची संख्या एक हजारच्या पुढे गेली आहे.
कोरोना वाढत असल्याने नागपूर, पुणे यासारख्या शहरांत कडक लॉकडाऊन अमलात आला आहे. मात्र अद्याप ठाणे, कल्याण, डोंबिवली या शहरांत तितके कडक निर्बंध लागू केलेले नाहीत. त्यामुळे अनेक लोक विनामास्क राजरोस फिरत आहेत. सोशल डिस्टन्सिंगचे नियम धाब्यावर बसवून बाजारपेठांमध्ये गर्दी होत आहे. कोरोनाचे भय लोकांच्या मनात एक तर कमी झाले आहे किंवा बंधने पाळण्यास लोक विटले आहेत. या तिन्ही शहरांत प्रचंड गर्दी असून, एकाचवेळी हजारो लोक बंधने पायदळी तुडवत असल्यास त्यांच्यावर कारवाई करून नियम न पाळल्यास कारवाई अटळ आहे, असा संदेश ठळकपणे देण्यात संबंधित महापालिकांना यश आलेले नाही. दररोज काही शेकडा लोकांवर कारवाई होते. पण नियम तोडणाऱ्यांच्या संख्येच्या तुलनेत ती संख्या नगण्य आहे.
सध्या विवाह सोहळ्यांना या शहरांत ऊत आला आहे. अनेक विवाह सोहळ्यांत निमंत्रितांचे बंधन पाळले जात नाही. गावात होणारी लग्ने, हळदीचे कार्यक्रम, डीजे लावून नाचगाणी याला एकाचवेळी शेकडो लोक हजर असतात. एवढ्या लोकांना रोखणे दोन-चार पोलिसांना अशक्य असते. त्यामुळे बऱ्याचदा मांडवली करून व पाहुणचार झोडून कारवाईला गेलेले पोलीस व महापालिका कर्मचारी परत येतात. एवढे सांगूनही लोक ऐकत नसतील, तर त्यांना त्यांच्या कर्माने कोरोना होऊ दे, अशी सरकारी यंत्रणेतील लोकांना शिस्त लावण्याची जबाबदारी असलेल्या मंडळींचीही भावना झाली आहे.
..........
भाजप, मनसेचा असहकार
महाराष्ट्र नवनिर्माण सेनेचे अध्यक्ष राज ठाकरे हे स्वत: मास्क घातल नाहीत. आता मनसेच्या नगरसेवकांनी, नेत्यांनीही मास्क घालणे बंद केले आहे. साहजिकच मनसैनिकांनाही मास्कचे वावडे निर्माण झाले आहे. भाजप हा राज्यातील विरोधी पक्ष असून, राज्य सरकार कोरोनाची हाताळणी करण्यात व लसीकरण करण्यात कसे अपयशी ठरले आहे, हे सिद्ध करण्याकरिता भाजपचे गल्लीपासून दिल्लीचे नेते झटत आहेत. त्यामुळे कोरोना नियम पाळणे व लसीकरण याला भाजपची मंडळी सक्रिय सहकार्य करीत नसल्याचे शिवसेनेचे व सरकारी कर्मचाऱ्यांचेही म्हणणे आहे. या तिन्ही शहरात भाजप व मनसेचे प्राबल्य आहे.
........
वाचली