मीरा रोड : शिवसेनेच्या महिला उपशहर संघटक तेजस्वी पाटील यांना अपशब्द वापरून शिवीगाळ व धमकावल्याप्रकरणी भाजप नगरसेविका नयना म्हात्रेंविरोधात भाईंदर पोलीस ठाण्यात गुन्हा दाखल झाला आहे. तर, भाजप नगरसेवक विनोद म्हात्रेंविरुद्ध अदखल पात्र गुन्हा दाखल करण्यात आला आहे.
राई गावात राहणाऱ्या पाटील यांनी १५ जूनला प्रभाग २३ मध्ये डासांचा प्रादुर्भाव वाढल्याने कीटकनाशक फवारणी करण्यासाठी महापालिका व आमदार गीता जैन यांना लेखी निवेदन दिले होते. १७ जूनला मुर्धे येथील रेव आगर परिसरात कीटकनाशक फवारणी सुरू असताना नगरसेविका म्हात्रे यांनी तेथे येऊन पाटील यांना अपशब्द वापरून शिवीगाळ केली. यानंतर शनिवारी राई गावात भाजप नगरसेवक विनोद म्हात्रे यांनीही तेजस्वी यांना दम दिला.
म्हात्रे यांचा अश्लील शिवीगाळ करणारा व्हिडिओ वायरल झाल्यानंतर आमदार जैन यांच्यासह शिवसेनेचे नगरसेवक, पदाधिकारी आदींनी भाईंदर पोलीस ठाण्यात पोलीस निरीक्षक मुकुट राव पाटील यांची भेट घेऊन कारवाईची मागणी केली. पोलिसांनी तेजस्वी यांचा जबाब नाेंदवून पुरावा म्हणून सादर केलेल्या व्हिडिओ क्लिपची पडताळणी केली. त्यानंतर विविध कलमांनुसार रविवारी रात्री नयना म्हात्रे यांच्याविरुद्ध गुन्हा दाखल केला. तर नगरसेवक विनोद म्हात्रे यांच्याविरुद्ध अदखलपात्र गुन्ह्याची नोंद केली आहे.