मीरारोड - नाताळ सणाच्या आनंदी आणि उत्साही वातावरणात उत्तन व भाईंदर येथील आकर्षक विद्युत रोषणाईने परिसर उजळून निघाला आहे . लोकांना देखील आकर्षक रोषणाईचे आकर्षण वाटत असून काही ठिकाणी तर सेल्फी पॉईंट उभारले आहेत .
भाईंदरचे जुने गाव आणि डोंगरी , उत्तन , पाली , चौक , तारोडी ह्या गावात ख्रिस्ती बांधवांची संख्या मोठी आहे . त्यामुळे ह्या भागात नाताळचा उत्साह मोठा आहे . ह्या भागातील विविध धार्मिक स्थळांना विद्युत रोषणाई केली गेली आहे . २४ डिसेम्बरच्या मध्यरात्री चर्च मध्ये प्रार्थनेसाठी मोठ्या संख्येने भाविकांनी गर्दी केली होती . प्रार्थना झाल्यावर एकमेकांना नाताळच्या शुभेच्छा दिल्या .
भाईंदर गावात तसेच उत्तन , डोंगरी आदी गावां मध्ये घरां वर तसेच गल्ली , परिसरात विद्युत रोषणाई केली गेली आहे . कंदील लावले आहेत . नाताळ गोठे साकारले गेले आहेत . विविध आकाराच्या आणि प्रकारच्या विद्युत रोषणाई मुळे परिसर उजळून निघाला आहेच शिवाय त्याचे आकर्षण देखील आहे . काही ठिकाणी तर फोटो काढण्यासाठी सेल्फी पॉईंट साकारले गेले आहेत . लोकं देखील अश्या सेल्फी पॉईंट तसेच आकर्षक रोषणाई केलेल्या घरांच्या बाहेर उभे राहून फोटो काढत आहेत .
सांताक्लॉज चे देखावे केले आहेत . लोकां मध्ये आनंद आणि उत्साह असून केवळ ख्रिस्ती बांधवच नव्हे तर हिंदू , मुस्लिम आदी धर्मीय देखील नाताळच्या आनंदात सहभागी झालेले दिसतात तसेच एकमेकांना शुभेच्छा देत असतात . दिवाळी मध्ये जसा फराळ केला जातो तसाच नाताळ मध्ये ख्रिस्ती बांधव देखील विविध खाद्यपदार्थ बनवतात . एकमेकांच्या घरी नाताळच्या शुभेच्छा देण्यासह फराळ देखील आवडीने केला जातो . विशेषतः लहान मुलां मध्ये नाताळचे आकर्षण जास्त दिसते .