ठाणे : कापूरबावडी पोलीस ठाण्यातील नरेंद्र शिंदे आणि अरुण परदेशी या दोन पोलिसांना मारहाण करण-या प्रदीप जाधव (२५, रा. काल्हेर, भिवंडी, ठाणे) या रिक्षाचालकाला पोलिसांनी सोमवारी अटक केली आहे. त्याला न्यायालयीन कोठडीत ठेवण्याचे आदेश ठाणे न्यायालयाने दिले आहेत.एका हाणामारीच्या गुन्हयात प्रदीप जाधव याला २९ एप्रिल रोजी पोलिसांनी ताब्यात घेतले होते. पोलीस हवालदार शिंदे हे त्यांचे कामकाज करीत असतांना प्रदीपला आरडाओरड न करण्याबाबत त्यांनी सुनावले. याचाच राग आल्याने त्याने त्यांना धक्काबुक्कती करुन त्यांच्या डाव्या हाताच्या करंगळीला चावा घेऊन जखमी केले. तर त्यांचे सहकारी पोलीस नाईक परदेशी यांनाही धक्काबुक्की करुन शिवीगाळ केली. याप्रकरणी शिंदे यांच्या तक्रारीनंतर प्रदीप विरुद्ध सरकारी कामात अडथळा आणून पोलिसांवर हल्ला केल्याप्रकरणी गुन्हा दाखल करुन अटक करण्यात आली आहे. उपनिरीक्षक एन. बी. गिरासे हे अधिक तपास करीत आहेत.