कल्याण : काही मिनिटांपुरती जरी वाहतूक थांबली तरी कर्णकर्कश हॉर्न वाजवत राहण्याचे फॅड वाहनचालकांमध्ये, विशेष करून दुचाकीस्वारांमध्ये वाढले आहे. पूर्ण रस्ता काही सेकंदातच मोकळा व्हावा, यासाठी हॉर्न वाजवण्याचा सपाटा सुरूच असतो. अशा प्रकारे ध्वनिप्रदूषण करणाऱ्या आणि इतर वाहनचालकांना अस्वस्थ करणाऱ्या प्रवृत्तींविरोधात ठोस कारवाई अपेक्षित असताना कल्याण आरटीओ परिक्षेत्राचा आढावा घेता या ठिकाणी फारशी कारवाई होत नसल्याने संबंधित वाहनचालकांना मोकळे रान मिळाले आहे. गेल्या वर्षभरातील आकडेवारी पाहता कर्णकर्कश हॉर्न वाजविल्याप्रकरणी केवळ २७ जणांवर दंडात्मक कारवाईचा बडगा उगारण्यात आला आहे. कोरोनाच्या प्रादुर्भावात सहा ते सात महिने कारवाई झाली नसल्याचे सांगितले जात असले, तरी सद्य:स्थितीला कर्णकर्कश हॉर्न आणि फटाकेदार सायलेन्सरचे फुटलेले पेव पाहता कारवाईचे दावे कागदावरच असल्याचे स्पष्ट होत आहे.
सार्वजनिक ठिकाणी मोठ्या आवाजाचे हॉर्न वाजवून किंवा सायलेन्सरद्वारे फटाके फोडून लोकांना आकर्षित करणे एक फॅशन झाली आहे. शहरातून हॉर्नचा आवाज करत वेगाने गाडी चालविण्याची क्रेझ युवकांमध्ये आहे. एकमेकांना खुन्नस देण्यासाठी हॉर्न वाजवण्याचे प्रकारही घडतात. बरेचदा याचे रूपांतर वादात होण्याचेही प्रकारही घडलेले आहेत. वाहतूक नियमांनुसार हॉर्न कधी व कशासाठी वाजवावेत, कुठे वाजवू नयेत, याचेही काही नियम आहेत. हॉस्पिटल, कोर्ट, सरकारी कार्यालये, शाळा, कॉलेज या ठिकाणी ‘नो हॉर्न’ असा फलक लावलेला असतो. परंतु या ठिकाणीही नियम मोडत हॉर्न वाजविला जातो. काही दुचाकींना पोलिसांचा सायरन लावला जातो. कोंडीतून पुढे जाण्यासाठी त्याचा वापर केला जातो, पण त्याकडेही यंत्रणेचे दुर्लक्ष होत आहे. कोरोनामुळे गेली सहा ते सात महिने कारवाईत काही प्रमाणात शिथिलता आल्याने ध्वनिप्रदूषण करणाऱ्यांचे चांगलेच फावले आहे.
------------------------------------
कारवाईत आर्थिक दंडाची तरतूद
शहरात दुचाकी वाहनधारकांची संख्या कमालीची वाढली असून वाहनांमध्ये मॉडीफिकेशन करून जास्त आवाजाचे सायलेन्सर आणि हॉर्न बसविले जात आहेत. मोटार वाहन कायद्यांतर्गत ध्वनिप्रदूषण करणारे कर्णकर्कश हॉर्न व फटाके फोडणारे सायलेन्सर असलेल्या वाहनचालकांवर दंडात्मक कारवाईची तरतूद आहे. परंतु ठोस कारवाई होताना दिसत नाही. गेल्या वर्षभरात केवळ २७ जणांवर कल्याण आरटीओने कारवाई केली आहे.
------------------------------------
कारवाई होतेय कुठे?
कर्णकर्कश हॉर्न आणि सायलेन्सरमध्ये बदल करून फटाक्यासारखा आवाज करणाऱ्यांविरोधात आरटीओप्रमाणे शहर वाहतूक शाखेच्या वतीनेही कारवाई केली जाते. परंतु वर्षभरात झालेल्या कारवाईची माहिती वाहतूक शाखेकडून मिळू शकली नाही. त्यामुळे संबंधित यंत्रणांकडून केले जाणारे कारवाईचे दावे कितपत खरे आहेत, असा सवाल यानिमित्ताने उपस्थित होत आहे.
------------------------------------
विशेष मोहीम
आमच्या विभागाकडून कारवाई सुरूच असते, त्याचबरोबर वाहतूक शाखाही कारवाई करते. मागील आठवड्यातच आरटीओ विभागांतर्गत सायलेन्सरमध्ये बदल करून मोठे आवाज करणाऱ्या दुचाकीचालकांविरोधात कारवाई केली आहे. पुढील काही दिवसांत ही कारवाई आणखी तीव्र केली जाणार आहे.
- तानाजी चव्हाण, उपप्रादेशिक परिवहन अधिकारी, कल्याण
------------------------------------------------------