भिवंडी: भरधाव वेगात जाणाऱ्या ट्रकने दुचाकीला जोरदार धडक दिली असता झालेल्या अपघातात एका १३ वर्षीय शालेय विद्यार्थ्याचा ट्रकखाली चिरडून जागीच तडफडून मृत्यू झाला असून त्याचा मित्र गंभीर जखमी झाल्याची घटना गुरुवारी दुपारच्या सुमारास तालुक्यातील खारबाव गावच्या हद्दीतील फिरींगपाडा येथे घडली आहे. घटनेनंतर ट्रक चालक फरार झाला आहे. या अपघाताची नोंद तालुका पोलिस ठाण्यात करण्यात आली असून पोलीसांनी सीसीटिव्हीच्या आधारे फरार ट्रक चालकाचा शोध सुरू केला आहे. यक्ष नवनाथ नाईक (१३) असे अपघातात दुर्दैवी मयत पावलेल्या शालेय विद्यार्थ्याचे नाव आहे. तर आर्यन पाटील असे त्याच्या गंभीर जखमी साथीदार मित्राचे नाव आहे.
मिळालेल्या माहितीनुसार, यक्ष हा ७ वी इयत्तेत शिकत असून आर्यन हा १० वी इयत्तेत शिकत आहे. आर्यन हा फिरिंग पाडा येथे राहत असल्याने तो मित्र यक्ष सोबत आजी - आजोबासाठी काही सामान घेऊन जात असताना सदर दुर्दैवी अपघात झाल्याची माहिती मिळाली आहे.
गुरुवारी दुपारी १ वाजेच्या सुमारास मयत यक्ष आणि आर्यन हे दोघे खारबाव गावातून ॲक्टिव्हा दुचाकीवरून फिरींगपाड्याच्या दिशेने कामानिमित्त निघाले होते.त्यावेळी खारबावच्या दिशेने भरधाव वेगाने जाणाऱ्या ट्रक चालकाने त्याच्या ताब्यातील ट्रक हयगयीने व वाहतुकीच्या नियमांकडे दुर्लक्ष करून दुचाकीला जोरात ठोकर दिली.या अपघातात दोघेही मित्र चिरडले गेले.त्यामध्ये यक्षचा जागीच मृत्यू झाला.दरम्यान घटनेची माहिती मिळताच तालुका पोलिसांनी घटनास्थळी दाखल होत मृतदेह शवविच्छेनाकरिता येथील इंदिरा गांधी रुग्णालयात पाठवला आहे.तर आर्यनची प्रकृती गंभीर असून त्यास उपचारासाठी अंजूर फाटा येथील खासगी रुग्णालयात दाखल करण्यात आले आहे.याप्रकरणी तालुका पोलिस ठाण्यात फरार ट्रक चालकाच्या विरोधात विविध कलमान्वये गुन्हा दाखल करून सीसीटिव्हीच्या साहाय्याने त्याचा शोध सुरू केला आहे.पुढील तपास तालुका पोलिस करीत आहेत.