लोकमत न्यूज नेटवर्क, मीरारोड - नशेत बेधुंद असलेल्या रिक्षा चालकाने मीरारोड मध्ये रस्त्यावरील ८ ते ९ जणांना उडवत जखमी केले तसेच ६ ते ७ दुचाकींना धडक दिल्या प्रकरणी नया नगर पोलिसांनी गुन्हा दाखल करून रिक्षा चालकास ताब्यात घेतले . गर्दीच्यावेळी भर रस्त्यात घडलेल्या ह्या थरार अपघातांची घटना सीसीटीव्ही मध्ये कैद झाली आहे .
गुरुवारच्या रात्री उशिरा मोहम्मद आतिफ सूर्या ( ४५ ) हे दुचाकी वरून घरी जात होते . नया नगर मधील अस्मिता क्लब जवळ एचडीएफसी बँक येथे एका भरधाव रिक्षाने त्यांना उडवले . त्यात त्यांच्या दुचाकीचे नुकसान होऊन पायाला जबर मार लागला. ती रिक्षा पुढे आणखी २ - ३ जणांना व दुचाकींना उडवत रसाज सर्कलच्या दिशेने निघून गेली .
पुढे रसाज सर्कल जवळील इराणी चहा समोर उभ्या असलेल्या मोहम्मद रियाज अन्सारी, मोहम्मद असीम अखलाक पारकर ( ४३ ) यांना तसेच अन्य दोघा - तिघांना रिक्षाने उडवले तसेच दुचाकींना धडक देत ती एन एच शाळा मैदानाच्या दिशेने गेली . रिक्षा वेडीवाकडी चालली होती व एकदा तर कलंडता कलंडता वाचली .
नंतर ती रिक्षा एन एच शाळे जवळ खांबाला धडकून रिक्षा चालक खाली पडला . तो नशेत बडबडत होता व त्याच्या डोक्याला मार लागून रक्त निघत होते . लोकांनी रुग्णालयात नेले . सदर घटनेची माहिती मिळाल्या नंतर पोलिसांनी गुन्हा दाखल करून रिक्षा चालक प्रमोद प्रेमचंद शुक्ला ( ३२ ) रा . इंदिरा नगर चाळ , रॉयल हॉटेल जवळ , जुहू , मुंबई विरुद्ध ५ मे रोजी पहाटे पावणे दोन वा . गुन्हा दाखल करून ताब्यात घेतले आहे .