- धीरज परब
मीरारोड - मीरा भाईंदर महापालिकेतील मंजूर असलेल्या २५६२ पदां पैकी १२५५ पदं रिक्त असली तरी त्यात बहुतांश पदे हि सफाई कामगार , मजूर , शिपाई , लिपिक टंकलेखक , अग्निशामक आदींची आहेत . परंतु सदर पदे हि सध्या ठेक्याने भरलेली असून कंत्राटी कर्मचाऱ्यांची संख्या ३ हजार पेक्षा जास्त आहे . त्यामुळे किती व कोणती ? रिक्त पदे भरली जाणार तसेच ठेक्यावरील कर्मचाऱ्यांना संधी मिळणार का ? या कडे लक्ष लागले आहे . गेल्या आर्थिक वर्षात आस्थापनेचा खर्च तब्बल २५३ कोटी ७७ लाख इतका झालेला असल्याने पद भरती करताना आस्थापनेचा खर्च ३५ टक्के मर्यादेत ठेवण्याची कसरत सुद्धा पालिकेला करावी लागणार आहे .
मीरा भाईंदर महापालिकेच्या सुधारित आकृती बंधास राज्य शासनाने २०१९ साली मंजुरी दिली होती . मंजूर आकृतीबंध नुसार वर्ग १ ची एकूण ६५ पदे असून त्यातील ३० पदे कार्यरत व ३५ पदे रिक्त आहेत . वर्ग २ ची ७७ पदे मंजूर असून त्यातील ४३ कार्यरत व ३४ पदे रिक्त आहेत . वर्ग ३ ची ८७३ पदे मंजूर आहेत . त्यापैकी ३८२ पदे भरली असून ४९१ पदे रिक्त आहेत . वर्ग ४ मधील मंजूर असलेल्या १५४७ पदां पैकी ८५२ पदे भरलेली आहेत . तर ६९५ पदे रिक्त आहेत . अश्या प्रमाणे वर्ग १ ते ४ ची एकूण २५६२ पदे मंजूर आहे . त्यातील १३०७ पदे भरलेली असून जवळपास निम्मी म्हणजेच १२५५ पदे हि रिक्त आहेत .
राज्य शासनाने नुकत्याच एका परिपत्रका नुसार रिक्त पदे हि आवश्यकता तसेच आस्थापना खर्चाच्या मर्यादेत राहून भरण्या बाबत सूचित केले आहे . त्यामुळे मीरा भाईंदर महापालिकेत सुद्धा नोकर भरतीचे वारे वाहू लागले आहेत . पालिकेच्या संबंधित विभागां कडून तश्या पद्धतीची आकडेवारी गोळा करण्याचे काम सुरु करण्यात आले आहे . पालिका आस्थापनेवरील रिक्त पदांची संख्या हि १२५५ असली तरी प्रत्यक्षात मात्र त्यातील बहुतांश पदे हि ठेक्याने वा ठोक मानधनाने भरलेली आहेत . नव्हे रिक्त पदां पेक्षा ठेका वा ठोक मानधनाने भरलेल्या पदांची संख्या दुपटी पेक्षा जास्त म्हणजेच तब्बल ३ हजार पेक्षा जास्त आहे .
उदाहरणार्थ पालिका आस्थापनेवर सफाई कामगारांची ११८० पैकी रिक्त पदे ५३८ इतकी आहेत . परंतु प्रत्यक्षात महापालिकेने दैनंदिन सफाईचे कंत्राट दिले असल्याने ठेक्या वरील कंत्राटी सफाई कामगारांची संख्याच सुमारे २२०० च्या घरात आहे . या शिवाय पालिकेने मुख्यालय इमारतीच्या सफाई सह रुग्णालय , सार्वजनिक शौचालये आदींच्या सफाईसाठी कंत्राटी सफाई कामगार ठेकेदार मार्फत घेतलेले आहेत . त्यामुळे सध्या कायम सेवेत असलेले बहुतांश सफाई कामगार शिपाई , लिपिक आदी कामे करत आहेत .
शासन निर्देशा नुसार आस्थापनेचा खर्च हा महसुली उत्पन्नाच्या ३५ टक्के मर्यादेत असावा असे बंधनकारक आहे . मीरा भाईंदर महापालिकेच्या २०२१ - २०२२ आर्थिक वर्षातील मिळालेल्या पालिका आकडेवारी नुसार प्रत्यक्ष महसुली उत्पन्न ७५१ कोटी २७ लाख इतके जमा झाले आहे . तर पालिकेच्या स्थायी व अस्थायी आस्थापने च्या वेतन - भत्ते आदींसह संबंधित अन्य आस्थापना खर्च मिळून तब्बल २५३ कोटी ७७ लाख ३० हजार रुपये इतका झालेला आहे . त्यामुळे आस्थापना खर्च ३५ टक्क्यांच्या मर्यादेत दाखवण्याची कसरत पालिकेला करावी लागणार आहे .
पालिकेच्या सार्वजनिक बांधकाम , वृक्ष प्राधिकरण , पाणी पुरवठा , सार्वजनिक आरोग्य विभाग , वैद्यकीय विभाग , पशु वैद्यकीय विभाग , अतिक्रमण विभाग , रुग्णालय - दवाखाने , स्थानिक संस्था कर , वाहन विभाग , कर विभाग , आस्थापना, शिक्षण, परिवहन आदी विभागात सुद्धा ठोक मानधनावर वा ठेकेदारा मार्फत कंत्राटी कर्मचारी - अधिकारी घेतलेले आहेत . पालिका प्रशासन ह्या पैकी किती खर्च आस्थापनेचा मोजते हा सुद्धा संशोधनाचा विषय आहे . तर एकूणच सध्या कार्यरत कायम स्वरूपातले तसेच ठोक मानधन व ठेका पद्धतीने काम करणाऱ्या कर्मचारी - अधिकाऱ्यांची एकत्रित संख्या सुद्धा मंजूर पदांच्या एकूण संख्येच्या दुप्पट पेक्षा जास्त आहे . तर भरती झाल्यास सध्या कार्यरत कंत्राटी वा मानधनावरील किती कर्मचारी - अधिकारी यांना संधी मिळेल ? या कडे कंत्राटी कर्मचाऱ्यांचे लक्ष लागले आहे .