नवी दिल्ली : भारताची टेनिसपटू सानिया मिर्झा आणि पाकिस्तान क्रिकेट संघाचा माजी कर्णधार शोएब मलिक यांना आज पुत्ररत्न झाले असल्याचे तुम्हाला माहिती असेल. पण त्याचे नाव काय ठेवले, याबाबत तुम्हाला काहीही माहिती नसेल. काही दिवसांपासून आई-वडिल यांच्या नावांमधल्या अक्षरांनी मुलांची नावं ठेवण्याची फॅश रुढ झाली आहे. त्याचबरोबर काही सेलिब्रेटींच्या मुलांचे फोटो आणि व्हिडीओ सोशल मीडियावर चांगलेच वायरलही झाले आहेत. त्यामुळे बऱ्याच जणांना आता सानिया आणि शोएब यांच्या मुलाचे नाव काय असेल, याची उत्सुकता लागून राहिली आहे.
गर्भवती झाल्यानंतरही सानिया सोशल मीडियावर जास्त अॅक्टीव्ह असल्याचे पाहायला मिळाले होते. आपले वेगवेगळे फोटो ती सोशल मीडीयावर शेअर करत होती. त्यामुळे सानियाच्या बाळाचीही उत्सुकता तिच्या चाहत्यांना होती. अखेर आज त्यांची प्रतिक्षा संपली आणि सानियाला मुलगा झाल्याचे वृत्त त्यांना समजले. शोएबने ट्विटर अकाऊंटवर ही घोषणा केली. त्याने लिहीले की,''तुम्हाला सांगताना आनंद होत आहे की मला मुलगा झाला आणि सानिया सुखरुप आहे. आम्हाला शुभेच्छा देणाऱ्या प्रत्येकाचे आभार.''
सानिया आपल्या मुलाचे नाव काय ठेवणार, यावर बरीच चर्चा सुरु होती. सानियाच्या मुलाचे नाव भारत आणि पाकिस्तान या दोन्ही देशांना जोडणारे असेल, असेही काही जणांना वाटत होते. पण सूत्रांनी दिलेल्या माहितीनुसार सानियाच्या मुलाचे नाव इजान मिर्झा मलिक असे असणार आहे.