WhatsApp ने 15 मे 2021 ते 15 जून 2021 या कालावधीत 20 लाख भारतीय युजर्सचे अकॉउंट बॅन केले आहेत. ही बंदी अपायकारक वागणुकीमुळे आणल्याची माहिती व्हॉट्सअॅप मेसेंजरने दिली आहे. ही माहिती व्हॉट्सअॅपवर नवीन माहिती आणि तंत्रज्ञान नियमावली (New IT Rules) लागू झाल्यानंतर समोर आली आहे. या नवीन नियमांतर्गत सोशल मीडिया कंपन्यांना प्रत्येक महिन्याला कम्प्लयांस रिपोर्ट (Compliance Report) प्रसिद्ध करावा लागतो, त्यानुसार व्हॉट्सअॅपने आपला रिपोर्ट जारी केला आहे.
व्हॉट्सअॅपने आपल्या नियमावलीच्या अंतगर्त एकूण 20,11,000 अकॉउंट्स एका महिन्यात बॅन केले आहेत. भारतीय युजर्सची ओळख +91 या देशाच्या कोडवरून केली जाते. व्हॉट्सअॅपवर जगभरातील एकूण प्रतिबंधित 80 लाख युजर्सपैकी 25 टक्के म्हणजे 20 लाख युजर्स भारतातील आहेत, अशी माहिती रिपोर्टमध्ये समोर आली आहे. बॅन केलेल्या युजर्सपैकी 95% लोक ऑटोमेटड मेसेज, बल्क मेसेजिंग किंवा स्पॅम मेसेजचा अनधिकृतपणे वापर करत होते.
जर युजर अश्लील, बेकायदेशीर, द्वेषपूर्ण, धमकावणारे आणि भीतीदायक मेसेज पाठवत असेल तर त्याचे अकॉउंट बॅन केले जाते, अशी माहिती कंपनीने दिली आहे. तसेच जर युजरने WhtasApp च्या टर्म्स अँड कंडीशनचे उल्लंघन केल्यावर देखील अकॉउंट बॅन होऊ शकते. जर तुम्हाला लोकप्रिय मेसेंजर व्हॉट्सअॅपचा वापर करायचा असेल तर वरील मेसेज पाठवणे टाळावे आणि नियमांचे पालन करावे.