Google ने यावर्षी ऑक्टोबरमध्ये आपली ‘Pixel 6’ सीरिज जागतिक बाजारात सादर केली आहे. या सीरिजमध्ये कंपनीने फ्लॅगशिप Google Pixel 6 आणि Pixel 6 Pro असे दोन फोन सादर केले होते. या फोन्समध्ये कंपनीच्या टेन्सर चिपसेटचा वापर करण्यात आला आहे, ही यांची खासियत होती. या डिवाइसेसना भरभरून प्रतिसाद मिळाल्यानंतर सर्वांनाच सीरिजमध्ये स्वस्त फोन येईल का? हा प्रश्न पडला होता. फ्लॅगशिपनंतर आता कंपनी मिड रेंजमध्ये Google Pixel 6a सादर करणार आहे, अशी बातमी आली आहे.
91mobiles आणि OnLeaks यांनी मिळून गुगलच्या आगामी Pixel 6a स्मार्टफोनचे रेंडर शेयर केले आहेत. या रेंडर्समधून कंपनीच्या स्वस्त स्मार्टफोनच्या डिजाईनची माहिती मिळाली आहे. तसेच या आगामी फोनच्या स्पेसिफिकेशन्सची माहिती देखील रिपोर्टमधून मिळाली आहे. या फोनमध्ये कंपनी टेन्सरच्या ऐवजी स्नॅपड्रॅगन चिपसेटचा वापर करणार आहे.
Google Pixel 6a
समोर आलेल्या रेंडर्सनुसार Google Pixel 6a स्मार्टफोची डिजाइन Pixel 6 आणि Pixel 6 Pro सारखीच आहे. या फोनमध्ये पंच होल असलेला फ्लॅट OLED डिस्प्ले मिळेल, ज्याचा आकार 6.2-इंच असेल. फ्लॅगशिप फोनप्रमाणे यात देखील इन-डिस्प्ले फिंगरप्रिंट सेन्सर देण्यात येईल. या पिक्सल फोनच्या बॅक पॅनलवर LED फ्लॅशसह ड्युअल रियर कॅमेरा सेटअप मिळेल. उजवीकडे वॉल्यूम रॉकर आणि पॉवर बटन तर डावीकडे सिम कार्ड स्लॉट मिळेल. Pixel 6a च्या तळाला USB type-C पोर्ट, एक स्पिकर ग्रील आणि माइक देण्यात येईल.
Google Pixel 6a चे संभाव्य स्पेसिफिकेशन्स
गुगल आपल्या मिड रेंज फोनमध्ये Tensor ला डच्चू देऊ शकते. त्याजागी Tensor lite किंवा Snapdragon 778G मिळू शकतो. त्याचबरोबर 8GB पर्यंत रॅम आणि 128GB स्टोरेज मिळू शकते. यातील कॅमेरा मात्र फ्लॅगशिप Pixel 6 प्रमाणे 50MP Samsung ISOCELL GN1 सेन्सर मिळेल. हा स्मार्टफोन Android 12 वर चालेल. याआधी हा फोन भारतात येईल कि नाही हे मात्र सध्यातरी सांगता येत नाही.