नवी दिल्ली - केंद्र सरकारने केंद्रीय अर्थसंकल्पात 1 फेब्रुवारी रोजी इलेक्ट्रॉनिक वस्तूंवरील कस्टम ड्युटीमध्ये बदल जाहीर केले होते. त्यामुळे स्मार्टफोन, स्मार्ट टीव्ही, हेडफोन, इअरबड्सच्या किमतीत बदल होणार आहेत. हा बदल 1 एप्रिल 2022 पासून देशभरात लागू होणार आहे. अशा परिस्थितीत स्मार्टफोनसह कोणत्या डिव्हाईसेसच्या किंमत किती वाढणार आहे. याविषयी जाणून घेऊया.
स्मार्टफोन
मोबाईल फोन चार्जरचे ट्रान्सफॉर्मर पार्ट्स, मोबाईल कॅमेरा मॉड्यूल्सच्या कॅमेरा लेन्सेस आणि इतर उपकरणांवर सरकारने 5 ते 12.5 टक्क्यांपर्यंत कस्टम ड्यूटी सूट दिली आहे. अशा प्रकारे, स्मार्टफोन बनवण्याचा खर्च कमी होईल. अशा परिस्थितीत स्मार्टफोन कंपन्या स्मार्टफोनची किंमत कमी करू शकतात, अशी अपेक्षा आहे.
स्मार्टवॉच आणि फिटनेस बँड
सरकारने स्मार्टवॉच उत्पादकांना 31 मार्च 2023 पर्यंत कस्टम ड्युटीमधून सूट देण्याची घोषणा केली आहे. त्यामुळे 1 एप्रिलनंतर देशातील स्मार्टवॉच आणि फिटनेस बँडच्या किमतीत घसरण पाहायला मिळू शकते.
वायरलेस इअरबड्स
सरकारने इअरबड्स निर्मितीमध्ये वापरल्या जाणार्या भागांच्या आयातीवर शुल्क वाढवले आहे. ज्यामुळे 1 एप्रिलपासून इअरबड्सच्या उत्पादन किंमतीत वाढ होऊ शकते. अशा परिस्थितीत, युजर्सना वायरलेस इअरबड्स, नेकबँड हेडफोनसाठी अधिक पैसे द्यावे द्यावे लागण्याची शक्यता आहे.
प्रीमियम हेडफोन्स
सरकारने आता हेडफोन्सच्या थेट आयातीवर 20 टक्के अधिक शुल्क आकारण्याची घोषणा केली आहे. हा नियम 1 एप्रिलपासून देशभरात लागू करण्यात येत असून यामुळे युजर्सना आयात केलेल्या हेडफोनसाठी जास्त किंमत मोजावी लागणार आहे. पण, दुसरीकडे देशात बनवलेल्या हेडफोन्सची मागणी वाढताना दिसत आहे.
फ्रिज
2022 च्या अर्थसंकल्पात, सरकारने रेफ्रिजरेटर बनवण्यासाठी वापरल्या जाणार्या कंप्रेसर आणि त्याच्या भागांवर आयात शुल्क वाढवण्याची घोषणा केली होती. जी 1 एप्रिलपासून लागू होईल. अशा परिस्थितीत 1 एप्रिलपासून रेफ्रिजरेटर उत्पादक देशातील रेफ्रिजरेटरच्या किमती वाढवू शकतात असा अंदाज आहे. एका हिंदी वेबसाईटने याबाबतचे वृत्त दिले आहे.