सोलापूर : तात्पुरत्या सेवेतील डॉक्टरांनी कायम करण्याच्या मागणीसाठी संप पुकारला होता. वैद्यकीय शिक्षण मंत्री अमित देशमुख यांच्या आश्वासनानंतर डॉक्टरांनी संप मागे घेतला आहे.
सिव्हिल हॉस्पिटलमधील ३४ डॉक्टरांचा या संपात सहभाग होता. संप मागे घेतल्यानंतर गुरुवारी सायंकाळपासून त्यांनी कामास सुरुवात केली.
मुंबई येथे वैद्यकीय शिक्षण मंत्री अमित देशमुख यांनी संपात सामील असलेल्या डॉक्टरांशी चर्चा केली. डॉक्टरांना सेवेत कायम करण्यासाठी आम्ही सकारात्मक आहोत. आमच्यावर विश्वास ठेवून थोडा वेळ द्या. नक्कीच तुमच्या अपेक्षेपेक्षा कमी वेळेत सेवेत कायम करण्याचे काम करू, असे आश्वासन दिले.
या बैठकीत राज्यातील १८ शासकीय वैद्यकीय महाविद्यालयातील तात्पुरत्या सेवेतील डॉक्टर उपस्थित होते. छत्रपती शिवाजी महाराज सर्वोपचार रुग्णालयातील डॉ. कुंदन कांबळे, डॉ. प्रज्ञेश पानशेवडीकर, डॉ. संचित खरे, डॉ. गजानन अल्पेवाड उपस्थित होते.