सोलापूर : एकाच घरातील तिघी मुलींना फूस लावून पळवून नेण्याची घटना शहरापासून जवळच असलेल्या एका गावात घडल्याचा प्रकार उघडकीस आला आहे. या प्रकरणी या मुलींच्या आईने पोलीस ठाण्यात धाव घेऊन फिर्याद नोंदवली आहे. पळवून नेलेल्यांपैकी दोन मुली आणि एक पुतणी असून जाताना त्यांनी साडेपाच लाखांची रोकड आणि २८ ग्रॅम सोन्याची दागिने नेल्याचे तक्रारीत म्हटले आहे. शहरापासून जवळ असलेल्या एका गावामध्ये एकत्रित असलेले कुटुंब किराणा दुकान चालवतात.
त्यातील फिर्यादी मुलीच्या आईच्या दोन मुली व पुतणी या तिघींना कोणीतरी अज्ञाताने फूस लावून पळवून नेले. २७ जुलैच्या दुपारी दीडच्या सुमारास या मुलींनी घरात साप निघाला आहे म्हणून आरडाओरडा केला. या दरम्यान दरवाजाला कडी लावून या तिघीही पसार झाल्या. जाताना साडेपाच लाखांची रोकड आणि २८ ग्रॅम वजनाचे दागिनेही नेल्याचे तक्रारीमध्ये नमूद केले आहे. तिघाही मुलींचा शोध घेऊनही त्या मिळून न आल्याने सलगर वस्ती पोलीस ठाण्यात धाव घेऊन कोणीतरी आमच्या मुलींना फूस लावून पळवून नेल्याची तक्रार नोंदवली आहे. या प्रकरणी पोलिसांनी भा. द. वि. ३६३, ३६६ अन्वये गुन्हा नोंदला आहे. तपास फौजदार मंद्रूपकर करीत आहेत.