- आप्पासाहेब पाटीलसोलापूर - नववर्षाचे स्वागत अन् धार्मिक पर्यटनाच्या निमित्ताने आलेल्या ३ लाख ८२ हजार १३७ भाविकांनी पंढरपुरातील विठ्ठलाचं दर्शन घेतल्याची माहिती मंदिर समितीने शनिवारी सकाळी पत्रकारांना दिली. या दहा दिवसाच्या काळात मंदिर समितीला २ कोटी ४१ लाख ५९ हजार २८७ रुपयांचे उत्पन्न मिळाल्याचेही मंदिर समितीने सांगितले.
दरम्यान, एक दिवसाची ट्रिप करण्याचे फॅड वाढले आहे. त्यामुळे बहुतांश लोक सोलापूर जिल्ह्यात प्रवेश केल्यानंतर पंढरपूर, अक्कलकोट, तुळजापूर व गाणगापूर याठिकाणच्या धार्मिक स्थळांना भेटी देतात. यंदा सलग सुट्ट्या अन् नववर्षानिमित्त पर्यटनासाठी हजारो लोकांनी सोलापूरला पसंती दिली.
पंढरपुरातील विठ्ठल-रूक्मिणी मातेच्या दर्शनासाठी महाराष्ट्रासह अन्य राज्यातील भाविकांनी मोठी गर्दी केली होती. या गर्दीमुळे पंढरपुरातील वाहतूकीवर मोठा ताण दिसून आला. हॉटेल, लॉजेस, कॉटैज व मठांमध्ये मोठी गर्दी दिसून आली. नववर्षाच्या निमित्तानं पंढरपुरातील विठ्ठल मंदिराला आकर्षक सजावट केल्यामुळे मंदिराचं सौदर्य खुलले होते. पंढरपुरबरोबरच सोलापुरातील सिध्देश्वर मंदिर, अक्कलकोटमध्ये स्वामी समर्थ मंदिर, गाणगापूर येथील दत्त मंदिर व तुळजापूर येथील तुळजाभवानी मातेच्या दर्शनासाठी मागील दहा ते बारा दिवसात मोठमोठया रांगा लागल्याचेही दिसून आले.