सोलापूर : रविवार पेठेतील एका डिजीटल बॅनर, मॅटिंगच्या गोडाऊनला शुक्रवारी अचानक दुपारच्या सुमारास आग लागली. या आगीत बॅनर, मॅटिंग जळून खाक झाले आहे. अंदाजित १९ ते २० लाखांचे नुकसान झाल्याची प्राथमिक अंदाज वर्तविण्यात आला आहे.
शुक्रवारी दुपारी दोन वाजून २३ मिनिटांनी रविवार पेठेतील अग्निशामक दलास बाबुराव खरात यांच्या गोडाऊनला आग लागल्याचा फोन आला. त्यानंतर तात्काळ तीन गाड्या घटनास्थळाकडे रवाना झाल्या. आगीत भडकत असतानाच पाण्याचा फवारा जोरात मारून अर्ध्या तासात आग विझविण्यात आली. या आगीत पत्राशेड, प्लॅस्टिक, लाकडं, बॅनर, मॅटिंग, मशिनरी, खुर्च्या, टेबल व अन्य साहित्य जळून खाक झाले आहे. गोडाऊनमध्ये लाईट नव्हती. त्यामुळे आगीचे नेमकं कारण समजू शकले नसल्याचे अग्निशामक दलाने सांगितले.
या आगीच्या घटनेत कोणतीही जिवितहानी झाली नाही. मात्र पत्राशेडवर बसलेल्या मांजराचा दुदैवी मृत्यू झाला. आगीचे लोळ परिसरात सर्वत्र पसरल्याने परिसरातील लोकांनी आगीच्या घटनास्थळावर मोठी गर्दी केली होती. घटनेची माहिती मिळताच पोलिसही घटनास्थळावर दाखल झाले होते.