- आप्पासाहेब पाटीलसोलापूर - सोलापुरातील भाजपाचे माजी शहराध्यक्ष प्रा. अशोक निंबर्गी यांनी रविवारी काँग्रेस पक्षात प्रवेश केला. प्रदेशाध्यक्ष नाना पटोले यांनी त्यांच्या हातात काँग्रेसचा झेंडा देत नियुक्ती पत्र दिले.
यावेळी काँग्रेसचे ज्येष्ठ नेते सुशीलकुमार शिंदे, माजी मुख्यमंत्री अशोक चव्हाण, पृथ्वीराज चव्हाण, आ. प्रणिती शिंदे, माजीमंत्री अस्लम शेख, माजी महसूलमंत्री बाळासाहेब थोरात, माजी मंत्री विजय वडेट्टीवार, राज्याच्या सहनिरीक्षक सोनल पटेल, चंद्रकांत हंडोरे, आमदार भाई जगताप, नसीम खान, काँग्रेसचे शहराध्यक्ष चेतन नरोटे यांच्यासह आदी काँग्रेसचे वरिष्ठ नेते उपस्थित होते.
प्रा. निंबर्गी हे भाजपचे कट्टर कार्यकर्ते मानले जात होते. जनसंघाच्या काळापासून ते कार्यरत आहेत. प्रा. निंबर्गी यांच्यासारख्या हाडाच्या कार्यकर्त्याने पक्ष सोडणे हा भाजपला धक्का मानला जात आहे. प्रा. निंबर्गी यांचे मन वळविण्याचा प्रयत्न भाजपच्या सोलापूर दक्षिण आणि अक्कलकोट तालुक्यातील नेत्यांनी केला; मात्र त्याला यश आले नाही.