सोलापूर : भरधाव वेगात निघालेल्या टमटमची दुचाकीला जोरात धडक बसली. या धडकेत दोघांचा जागीच मृत्यू झाला तर दोघे जण गंभीर जखमी झाल्याची घटना सांगोला तालुक्यातील चिकमहूद-दिघंची रोडवरील बंडगरवाडी पाटीजवळ घडली.
याबाबत सविस्तर वृत्त असे की, गुरूवार १६ फेब्रुवारी रोजी सायंकाळी सात वाजण्याच्या सुमारास भरधाव वेगात निघालेल्या टमटमने दुचाकीला जोराची धडक दिली. या भीषण अपघातात दोघेजण जागीच ठार तर दुचाकी वरील एकजण व टमटम मधील लहान मुलगा असे दोघेजण गंभीर जखमी झाले आहेत.
या अपघातानंतर स्थानिकांनी जखमींना शासकीय रूग्णवाहिकेतून उपचारासाठी पंढरपूर येथील शासकीय रूग्णालयात हलविले. अपघातातील मयत व जखमी हे माळशिरस तालुक्यातील असल्याचे सांगण्यात आले. घटनास्थळावर सांगोला तालुका पोलिसांची टीम पोहोचली असून अधिक तपास करीत आहेत. पंचनामाचेही काम सुरू झाले आहे.