पंढरपूर - मंगळवेढा मतदार संघासाठी प्रशांत परिचारक, अभिजीत पाटील, समाधान आवताडे, बी. पी. रोंगे यांनी भाजपकडून पोटनिवडणूक लढवण्याची इच्छा व्यक्त केली असल्याची माहिती सोलापूर जिल्हा बूथ अभियान प्रभारी बाळाभाऊ भेगडे यांनी सांगितले.
भारतीय जनता पार्टी व मित्र पक्षाचे माजी राज्यमंत्री तथा सोलापूर जिल्हा बूथ अभियान प्रभारी बाळाभाऊ भेगडे यांची पत्रकार परिषद रविवारी झाली. यावेळी आमदार प्रशांत परिचारक, माजी पालकमंत्री लक्ष्मणराव ढोबळे, भाजपाचे धैर्यशील मोहिते पाटील, श्रीकांत देशमुख, बी. पी. रोंगे, भास्कर कसगावडे उपस्थित होते.
पुढे बाळाभाऊ भेगडे म्हणाले, महावसुली सरकारने राज्याचे वाटोळे केले आहे. पोलिसांच्या माध्यमातून १०० कोटी रुपयांची खंडणी मागण्याचे काम राज्याचे गृहमंत्री करतात. हे राज्याचे दुर्दैव आहे. ठाकरे सरकार नसून वसुली सरकार आहे, अशी भावना सर्वांची झाली आहे. यामुळे पोटनिवणुकीत भाजपला यश मिळेल असे मत सोलापूर जिल्हा बूथ अभियान प्रभारी बाळाभाऊ भेगडे यांनी व्यक्त केले.