सोलापूर : मराठा आरक्षणासाठी सोलापूर शहर व जिल्ह्यात सर्वत्र शांततेत बंद असताना शिवाजी चौकातील दगडफेकीने आंदोलनाला हिंसक वळण लागले़ सोलापूर शहरातील शिवाजी चौकात दुपारी बाराच्या सुमारास आंदोलनकर्त्यांनी दगडफेक करून दहशत पसरविण्याचा प्रयत्न केला़ याचवेळी पोलीस उपायुक्त पोर्णिमा चौगुले यांची गाडी आंदोलनकर्त्यांनी दगडफेक करून फोडली.
मराठा समाजाला आरक्षण मिळावे या मागणीसाठी सकल मराठा समाज व मराठा क्रांती मोर्चाच्यावतीने सोमवारी सोलापूर बंदची हाक दिली होती़ सकाळपासूनच शिवाजी चौकातील दुकाने, हॉटेल्स १०० टक्के बंद ठेवण्यात आली होती़ याचवेळी दुपारी बाराच्या सुमारास काही आंदोलनकर्त्यांनी शिवाजी चौकात घोषणाबाजी करण्यास सुरूवात केली.
यावेळी पोलीसांनी घोषणाबाजी करू नका अशी विनंती केल्यावर आंदोलनकर्त्यांनी पोलीसांवर दगडफेक केली़ याचवेळी पोलीस उपायुक्त पोर्णिमा चौगुले यांच्यासह अग्निशामक दलाची गाडी फोडली़ यावेळी पोलीसांनी आंदोलन कर्त्यांवर सौम्य लाठीचार्ज केला.