विलास जळकोटकर, सोलापूर : महाराष्ट्रातील विविध जिल्ह्यांमध्ये दरोडा, जबरी चोरी, घरफोड्या घालून दहशत माजवणाऱ्या आंतरजिल्हा टोळीतील तिघांना एमआयडीसी पोलिसांनी जेरबंद केले. त्यांच्याकडून दोन किलो चांदी, एक पिस्टल, दोन दुचाकी, दोन चारचाकी असा ६ लाख १४ हजारांचा मुद्देमाल जप्त करण्यात आला. एमआयडीसी पोलीस ठाण्याच्या हद्दीतील चार आणि जेलरोड हद्दीतील दोन असे एकूण सहा गुन्हे उघडकीस आणले.
सोलापूर शहरात रात्रीच्या होणाऱ्या घरफोड्यांना आळा घालण्यासाठी पोलीस आयुक्तांनी पोलिसांना सूचना दिल्या होत्या. त्या अनुषंगाने वरिष्ठ पोलीस निरीक्षक राजन माने यांनी गुन्हे प्रकटीकरण शाखेचे पथक प्रमूख विक्रम देशमुख यांना या गुन्ह्यांचे पाळेमुळे खणून काढण्याचे आदेश दिले होते. त्यानुसार ११ ऑक्टोबर रोजी पहाटे बालाजी ज्वेलर्स निलमनगर येथे चोरी केलेल्या टोळीतील राहूल रवींद्रसंग भोंड (रा. हडपसर, पुणे) व सुरज प्रकाश चव्हाण (रा. सुनील नगर, एमआयडीसी, सोलापूर) हे पोलीस कोठडीत आहेत. पोलिसांनी सुरज चव्हाण याच्याकडे घरफोडीच्या गुन्ह्याबद्दल कसन चौकशी केली असता त्याने चोरीतील अन्य दागिने प्रेम काशिनाथ कोळी याच्याकडे असल्याचे सांगितले. लागलीच फौजदार रजपूत यांनी सूत्र हलवली आणि त्यांनी प्रेम कोळी याला कलावती नगर, एमआयडीसी सोलापूर) येथून अटक केली.
अटक केलेल्या प्रेम कोळी याला पोलिसी खाक्या दाखवून चौकशी केली असता त्याने १४ ऑक्टोबर रोजी पहाटे दरोडा टाकण्याच्या उद्देशाने विणकर वसाहत येथून चोरलेली व कोंड्याल शाळेजवळ पार्क केलेली कार घेण्यासाठी प्रेम कोळी व त्याच्या दोन साथीदार तिलकसिंग टाक व हन्सराज उर्फ हन्सुसिंग रणजितसिंग टाक हे तिघे कार लावली होती तेथे गेले. तेथे या आरोपींनी फौजदार रजपूत यांच्या अंगावर कार घालण्याचा प्रयत्न केला. तेवढ्यात रजपूत यांनी कार थांबवण्यासाठी टायरच्या दिशेने फायरिंग केली. त्यात सदर आरोपी पळून गेले होते.सहा गुन्हे उघडकीस
प्रेम कोळी याला अटक केल्यानंतर त्याने गुन्ह्यात पळून जाण्यासाठी वापरलेली स्वत:ची बाईक, ज्वेलर्सचे दुकानातील चोरलेली २ किलो चांदी, एक ग्रॅम सोने, पिस्टल, एक चॉपर, जेलरोड पोलीस ठाण्याच्या हद्दीतून चोरलेली कार, एक दुचाकी जप्त करण्यात आली. असे एकूण दोन दुचाकी व दोन कार जप्त करण्यात आल्या. एकूण सहा गुन्हे उघडकीस आले.आंतरराज्य टोळीच्या मुसक्या आवळल्या
पोलिसांच्या अटकेत सध्या सुरज प्रकाश चव्हाण (हडपसर), प्रेम काशिनाथ कोळी, राहूल रवींद्रसिंग भोंड हे तिघे अटकेत आहेत. सूत्रधार असणारे तिलकसिंग टाक आणि हन्सराज टाक हे फरार आहेत. घरफोड्या, दरोडे, सराफ दुकाने फोडणे असे गंभीर गुन्हे या आरोपींविरुद्ध आहेत. महाराष्ट्राभर हैदोस माजवणाऱ्या या आंतरराज्य टोळीतील तिघांना अटक करण्यात एमआयडीसी पोलिसांना यश आले आहे.