आप्पासाहेब पाटील, सोलापूर : सोलापूर शहरात काही ठिकाणी स्थानिक पोलिसांच्या संरक्षणाखाली अवैधरित्या डान्सबार सुरू असल्याचा खळबळजनक आरोप आमदार सुभाष देशमुख यांनी विधानसभेत केला. या डान्सबारमुळे शहरातील कायदा व सुव्यवस्थेचा प्रश्न गंभीर बनत असून सामाजिक वातावरण बिघडण्याची शक्यता असल्याचे त्यांनी सभागृहात नमूद केले. तसेच तात्काळ बंदोबस्त करण्याची मागणीही त्यांनी केली.
देशमुख म्हणाले की, सोलापूर शहरासह विशेषतः दक्षिण तालुक्यातील काही ग्रामीण भागांत अवैधरित्या डान्सबार सुरू आहेत. यासंदर्भातील व्हिडिओ क्लिप त्यांनी पोलीस आयुक्त कार्यालयाकडे दिल्याची माहितीही त्यांनी सभागृहात दिली. संबंधित क्लिपनंतर काही पोलीस अधिकाऱ्यांनी डान्सबारमध्ये जाऊन पाहणी केली. मात्र अधिकारी बाहेर येताना दिसत असले तरी संबंधित डान्सबारवर कोणतीही ठोस कारवाई झालेली नाही, असा आरोप त्यांनी केला.
यामुळे हे डान्सबार पोलिसांच्या संरक्षणाखालीच सुरू असल्याचा संशय निर्माण होत असल्याचे देशमुख यांनी स्पष्ट केले. अशा प्रकारांवर तात्काळ कठोर कारवाई करावी, अशी मागणी त्यांनी सरकारकडे केली. दरम्यान, गृहराज्यमंत्री पंकज भोयर यांनी या प्रकरणाची सखोल चौकशी करून दोषींवर कडक कारवाई करण्यात येईल, अशी स्पष्ट भूमिका सभागृहात मांडली. त्यामुळे सोलापूरकरांचे लक्ष आता प्रशासनाच्या पुढील कारवाईकडे लागले आहे.
Web Summary : MLA Subhash Deshmukh alleges illegal dance bars operate in Solapur with police protection, creating law and order issues. He demanded immediate action, prompting a government inquiry.
Web Summary : विधायक सुभाष देशमुख ने सोलापुर में पुलिस संरक्षण में अवैध डांस बार चलने का आरोप लगाया, जिससे कानून व्यवस्था बिगड़ रही है। उन्होंने तत्काल कार्रवाई की मांग की, जिसके बाद सरकार ने जांच के आदेश दिए।