आप्पासाहेब पाटील, सोलापूर: दिवसभर कडक उन्ह अन् उकाडा सहन करणाऱ्या सोलापूरकरांना मंगळवारी सायंकाळी पाच वाजण्याच्या सुमारास पावसाने सुखद दिलासा दिला. सायंकाळी पाच वाजता शहरातील बहुतांश भागात पावसाने जोरदार हजेरी लावली.
दरम्यान, शहरातील बहुतांश रस्त्यांवर पाणीच पाणी साचले होते. शहरातील समाधान नगर, मुस्लिम पेठ, अक्कलकोट रोड एमआयडीसी, आसरा चौक, सात रस्ता, विजापूर रोड, जुळे सोलापूर, नई जिंदगी, विजापूर वेस, बोरामणी नाका, जोडभावी पेठ, अशोक चौक आदी भागात पावसाने हजेरी लावली. अचानक आलेल्या पावसामुळे बाजारपेठेत चांगलाच गोंधळ उडाला तर अनेकांनी पावसाचा आनंद घेण्यासाठी चक्क भिजत घर गाठले. सोमवारी रात्री विजापूर रोड परिसरात वादळी वाऱ्यासह पाऊस पडला. यामुळे अनेक घरांचे नुकसान झाले. नुकसानग्रस्त घरांची पाहणी आ. प्रणिती शिंदे यांनी मंगळवारी सकाळी केली. नुकसानग्रस्त कुटुंबियांना मदतीचे आश्वासनही आ. शिंदे यांनी दिले.