सोलापूर : मुहूर्तावर घेतलेला रिक्षाचे पेढे नातेवाईकांना वाटून गावाकडे जात असताना कोंडी गावाच्या नजीक ट्रकला रिक्षाने पाठीमागून जोरदार धडक दिल्याने लहू रामा मस्के (वय ६४, रा. नांदगाव, ता. मोहोळ ) यांचा मृत्यू झाला. ही घटना गुरुवारी रात्री घडली.
मयत लहू मस्के यांनी कालच्या बुधवारी नवीन रिक्षा घेतली होती. या रिक्षाचे टप मारण्याचे काम करण्यासाठी व नातेवाईकांसोबत आनंद व्यक्त करण्यासाठी पेढे भरण्यासाठी मस्के हे सोलापुरात आले होते. नातेवाईकांना भेटल्यानंतर ते राहत्या गावी नंदगाव येथे जात असताना कोंडी परिसरातील पेट्रोल पंपा समोर जाणाऱ्या ट्रकला पाठीमागून धडक दिली.
यात मस्के हे गंभीर जखमी झाले. त्यांना लगेच ॲम्बुलन्सने उपचारासाठी छत्रपती शिवाजी महाराज सर्वोपचार रुग्णालयात दाखल करण्यात आले. उपचारापूर्वीच त्यांचा मृत्यू झाला. या घटनेची नोंद सिव्हील पोलीस चौकीत झाली आहे. दरम्यान ही घटना कळतात नातेवाईकांनी हॉस्पिटलमध्ये गर्दी केली होती. त्यांच्या पश्चात पत्नी, दोन मुले एक मुलगी असा परिवार आहे.