नवी दिल्ली - सोशल मीडियावर अनेक भन्नाट गोष्टी या व्हायरल होत असतात. प्रेमासाठी काही लोक वाटेल ते करतात. त्यांचे किस्से देखील काही वेळी चर्चेचा विषय़ ठरतात. अशीच एक घटना आता समोर आली आहे. काही दिवसांपूर्वी दहा रुपयांच्या नोटेचा एक फोटो तुफान व्हायरल झाला होता. ज्यामध्ये एका तरुणीने तिचा प्रियकर विशालसाठी 10 रुपयांच्या नोटेवर एक मेसेज लिहून तिचं लग्न ठरलं असल्याचं सांगितलं. तसेच कुसुम नावाच्या तरुणीने संकटात सापडल्यावर प्रियकर विशालला तिच्या मदतीसाठी येण्याची विनंती देखील केली होती.
"विशाल, माझं लग्न 26 एप्रिलला आहे. मला इथून घेऊन जा. माझं तुझ्यावर खूप प्रेम आहे. तुझी कुसुम" ही नोट खूप व्हायरल झाल्यानंतर लोकांनी विविध कमेंट्स केल्या आहेत. 26 एप्रिलआधी कुसुमचा हा मेसेज विशालला पोहोचवला पाहिजे… प्रेमात असलेल्या दोन व्यक्तींनी एकत्र येणे आवश्यक आहे असं युजरने लिहिलं होतं. तसेच कृपया तुमच्या ओळखीच्या सर्व विशालला टॅग करा असंही सांगितलं होतं. त्यानंतर अनेक लोक सोशल मीडिया प्लॅटफॉर्मवर सर्व विशालला टॅग करत होते. यावर हटके प्रतिक्रिया देखील समोर येत आहेत. विशेष म्हणजे आता कुसुमचा मेसेज विशालला मिळाला असून 10 रुपयांची नोट पुन्हा एकदा जोरदार व्हायरल होत आहे.
कुसुमच्या मेसेजला विशालने उत्तर दिलं आहे. त्यासाठी त्याने देखील दहा रुपयांचीच नोट वापरली आहे. ट्विटरवर 10 रुपयांच्या नोटेचा आणखी एक फोटो समोर आला आहे, विशालने कुसुमला नोटेच्या पाठीमागे निळ्या पेनने खास मेसेज लिहून उत्तर दिलं आहे. "कुसुम, मला तुझा मेसेज मिळाला आहे. मी तुला घ्यायला येईन. माझं तुझ्यावर खूप प्रेम आहे. तुझा विशाल" असं म्हटलं आहे. खरंच विशाल कुसुमला घेऊन जाणार का? याविषयी आता सोशल मीडियावर चर्चेला उधाण आलं आहे.