मुजफ्फरनगर-
विराट कोहलीनं न्यूझीलंड विरुद्धच्या सेमी-फायनल सामन्यात एकदिवसीय क्रिकेटमधलं आपलं ५० वं शतक साजरं केलं. मुंबईच्या वानखेडे स्टेडियममध्ये सुरु असलेल्या सामन्यात किंग कोहलीनं एकूण ११७ धावांची दमदार खेळी साकारली. उत्तर प्रदेशात कोहलीचा चाहता असलेल्या एका हॉटेल मालकानं तर आज चक्क विराट आज जितक्या धावा करेल तितका डिस्काऊंट देणार असल्याचं जाहीर केलं होतं. त्यामुळे आज त्याला ग्राहकांना मोफत बिर्याणी वाटप करावं लागलं.
मुजफ्फरनगरच्या प्रसिद्ध 'हाजी मकबूल की तहरी' नावाच्या हॉटेलचे संचालक मोहम्मद दानिश रिजवान हा विराट कोहलीचा मोठा चाहता आहे. या वर्ल्डकपमध्ये त्यानं आपल्या ग्राहकांसाठी एक वेगळीच ऑफर दिली. किंग कोहली जितक्या धावा करेल तितका डिस्काऊंट दिली जाईल अशी घोषणा हॉटेल मालकानं केली होती. कोहलीनं आजच्या सामन्यात ११७ धावांची खेळी साकरली आणि हॉटेल मालक मोहम्मद रिझवान यांनी दिलेलं वचन पाळत ग्राहकांना चक्क फुकटात बिर्याणी खाऊ घातली आहे.
याआधीही भारत विरुद्ध श्रीलंका सामन्यात कोहलीनं ८८ धावांची खेळी साकारली होती. त्यानुसार रिझवान यानं ६० रुपयांची चिकन बिर्याणी प्लेट चक्क ७ रुपयांना विकली. म्हणजेच बिर्याणीवर ८८ टक्के डिस्काऊंट दिला होता. आज मुंबईतील सामन्यात कोहलीनं ११७ दावा केल्या. तर त्यानं ग्राहकांना मोफत बिर्याणी वाटप केलं आहे. यासाठी तब्बल ४५० हून अधिक ग्राहकांनी रजिस्ट्रेशन केलं होतं.
"वर्ल्डकपमध्ये भारताचा सामना कोणत्याही संघाविरुद्ध असला तरी आमची ऑफर सुरूच राहील. उलट मला तर वाटतं कोहलीनं द्विशतक ठोकावं आणि आम्हाला प्रत्येकाला दोन-दोन प्लेट बिर्याणी वाटता यावी. कारण मी त्याचा प्रचंड मोठा चाहता आहे. आतापर्यंत अनेक ग्राहकांनी या ऑफरचा लाभ घेतला आहे आणि तर रजिस्ट्रेशन केलेल्यांपैकी काही जण नंतर येऊनही डिस्काऊंटवर बिर्याणी खाऊ शकणार आहेत", असं हॉटेल मालक रिझवान यांनी सांगितलं.