जेवताना अनेक वेळा अचानक ठसका लागतो, अन्नाचा कण श्वासनलिकेत अडकतो. अशावेळी आपल्याला श्वास घेण्यास त्रास होऊ लागतो. अशी घटना काही वेळा जीवावर देखील बेतू शकते. अशीच एक घटना आता समोर आली आहे. सोशल मीडियावर या घटनेचा एक व्हिडीओ जोरदार व्हायरल होत आहे. ब्राझीलच्या साओ पाओला येथे ही धक्कादायक घटना आहे. रेस्टॉरंटमध्ये आलेल्या एका व्यक्तीच्या घशामध्ये अन्नाचा तुकडा अडकला. यानंतर काहीच वेळात तो बेशुद्ध झाला. यानंतर जे काही घडलं ते एखाद्या चमत्कारापेक्षा कमी नव्हतं.
सोशल मीडियावर व्हायरल झालेल्या सीसीटीव्ही फुटेजमध्ये रेस्टॉरंटमध्ये बसलेल्या एका व्यक्तीच्या घशात जेवण करत असतानाच अन्नाचा तुकडा अडकतो. यामुळे त्याला त्रास होऊ लागतो. यानंतर काहीच वेळात तो बेशुद्ध होऊन टेबलवर पडतो हे पाहायला मिळत आगेत. तसेच यानंतर मागे बसलेल्या महिलेला हे जाणवताच ती या व्यक्तीच्या जवळ येते. यादरम्यान इतरही लोक तिथे जमा होतात. सर्व या व्यक्तीला उठवण्याचा प्रयत्न करू लागतात. मात्र हा व्यक्ती काहीच हालचाल करत नाही.
वेटरचं सर्वत्र कौतुक, व्हिडीओ जोरदार व्हायरल
रेस्टॉरंटमधील लोक वेटरला बोलवतात. यानंतर वेटर जे काही करतो ते पाहून सर्वांनाच आश्चर्याचा धक्का बसतो. वेटर या व्यक्तीला मागील बाजूने पकडून जोरजोरात उठवतो आणि धक्के देतो. यानंतर एक पोलीसही तिथे येऊन वेटरची मदत करतो. यानंतर या व्यक्तीच्या गळ्यात अडकलेला तुकडा बाहेर पडतो आणि तो श्वास घेऊ लागतो. वेटर आणि पोलीस मिळून या व्यक्तीचा जीव वाचवतात. घटनेचा व्हिडीओ तुफान व्हायरल झाला आहे. या वेटरचं सर्वत्र कौतुक केलं जात आहे. हा व्हिडिओ GoodNewsCorrespondent नावाच्या ट्विटर अकाऊंटवरुन शेअर करण्यात आला आहे.
"सुदैवाने वेटर वेळेवर आला आणि व्यक्तीचा जीव वाचवला"
एका दिवसाआधी शेअर झालेला हा व्हिडिओ आतापर्यंत 1 लाख 30 हजारहून अधिकांनी पाहिला आहे. तर 900 हून अधिकांनी लाईक केला आहे. या व्हिडिओवर लोक निरनिराळ्या प्रतिक्रिया देत आहेत. एका युजरने कमेंट करत लिहिलं, सुदैवाने वेटरने वेळेवर येत या व्यक्तीचा जीव वाचवला. अशा लोकांना सलाम, तर दुसऱ्या एका युजरने लिहिलं, वेटरचं जितकं कौतुक करावं तितकं कमीच आहे. तर आणखी एकाने म्हटलं की असे लोकच खरे हिरो आहेत. एका हिंदी वेबसाईटने याबाबतचे वृत्त दिले आहे.