नवी दिल्ली - प्रेमासाठी अनेकजण वाटेल ते करतात. त्यांचे भन्नाट किस्से हे सातत्याने समोर देखील येतात. ब्रेकअपनंतर किंवा लग्नाला नकार दिल्यानंतर आपलं दुःख व्यक्त करणाऱ्या अनेकांचे व्हिडीओ सोशल मीडियावर व्हायरल होत असतात. काही व्हिडिओमध्ये तर मुलं थेट तरुणीच्या लग्नात जाऊनच गोंधळ घालताना दिसतात. पण सध्या सोशल मीडियावर एक वेगळा व्हिडीओ व्हायरल होत आहे. आपलं लग्न थांबवण्यासाठी ब्रॉयफ्रेंड आला नाही म्हणून नवरी नाराज झाल्याची घटना समोर आली आहे. सध्या सर्वत्र याच व्हि़डीओची जोरदार चर्चा रंगली आहे.
'बॉयफ्रेंडला जळवण्यासाठी लग्न केलं पण तो आलाच नाही...' असं म्हणत नवरीने आपली व्यथा मांडली. यावेळी ती रडताना देखील दिसत आहे. नवरी लग्नानंतर आपल्या पतीसोबत एका स्टुडीओमध्ये पोहोचली आहे. ती आपल्याला एक गाणं गायचं असल्याचं सांगते. जेव्हा तिला विचारलं जातं की तुला गाणं कोणासाठी गायचं आहे, तेव्हा ती सांगते की माझ्या एक्स बॉयफ्रेंडसाठी. हे ऐकून स्टुडीओमधील एक तरुण तिला विचारतो की तुझ्या प्रियकराचं नाव काय आहे. यावर मी त्याचं नाव घेऊ शकत नाही असं नवरी म्हणते. कारण यामुळे त्याची बदनामी होईल. मी त्याच्यावर खरं प्रेम करते असंही तिने सांगितलं.
नवरी हे सांगताना अचानक रडू लागते. तरुण तिला विचारतो की तू का रडत आहेस. यावर ती उत्तर देते की मी माझ्या बॉयफ्रेंडवर खूप प्रेम करते. मात्र तो दुसरीवरच प्रेम करतो. मी तर त्याला वाईट वाटावं म्हणून लग्नाचं नाटक केलं होतं. मात्र तो माझं लग्न थांबवायलाही आला नाही. मी पूर्णपणे उद्ध्वस्त झाले आहे. नवरीचा हा व्हिडीओ सोशल मीडियावर तुफान व्हायरल होत आहे. अनेकांनी व्हिडीओ लाईकही केला आहे. एका हिंदी वेबसाईटने याबाबतचे वृत्त दिले आहे.