सोशल मीडियावर एका महिला न्यूज अँकरचा व्हिडीओ व्हायरल होत आहे. यामध्ये तिने ऑन एअर घटस्फोटाची घोषणा केली आहे. लाईव्ह प्रसारण असल्याने न्यूज चॅनलला देखील यात काहीच करता आलेले नाही. या साऱ्या प्रकारामुळे प्रेक्षक हैराण झालेले आहेत.
महत्वाचे म्हणजे या न्यूज अँकरने आज आपण शोच्या अखेरीस महत्वाची घोषणा करणार असल्याचे इन्स्टाग्रामवर म्हटले होते. तिने खरोखरच याची घोषणा करत त्या शो मध्ये असलेल्या एका खेळाडूला तू नंतर भेट, अशी ऑफरही देऊन टाकली आहे.
हा प्रकार अमेरिकेतील आहे. डेली मेलच्या वृत्तानुसार, या महिलेचे नाव जूली बॅंडेरस आहे. 49 वर्षीय ज्युली ही न्यूयॉर्कमधील फॉक्स न्यूज चॅनलची अँकर आहे. आज रात्री ११ वाजता शोच्या शेवटी माझी एक छोटीशी घोषणा आहे, असे तिने पोस्टमध्ये म्हटले होते. आता या घोषणेचा व्हिडीओ व्हायरल होत आहे.
शोच्या होस्टने तिला व्हॅलेंटाइन डेच्या दिवशी तिच्या पतीकडून काही मिळत आहे का असे विचारले. तेव्हा तिने ही घोषणा केली. मी घटस्फोट घेत आहे. आता मी पुढे जाणार आहे. तुम्हा सर्वांचे आभार. ही ब्रेकिंग न्यूज होती, असे म्हटले. इतकंच नाही तर ज्युलीने व्हॅलेंटाइन डेला 'मूर्ख' आणि 'हास्यास्पद' असंही म्हटलं आहे.
ज्युलीने 2009 मध्ये आर्थिक सल्लागार अँड्र्यू सॅनसोन (55) यांच्याशी लग्न केले. त्यांना तीन मुले आहेत. गेल्या वर्षी डिसेंबरमध्येच तिने अँड्र्यूपासून वेगळे होण्याचे संकेत दिले होते. बऱ्याच दिवसांपासून ती फक्त मुलांसोबतचे फोटो पोस्ट करत आहे.