जंगलातील सर्वात खतरनाक शिकारी कोण तर वाघ हेच उत्तर असेल. वाघाची दहशत आपण नेहमीच वेगवेगळ्या व्हिडीओंमधून बघत असतो. सध्या वाघाचा एक व्हिडीओ सोशल मीडियावर व्हायरल झाला आहे. हा व्हिडीओ अभिनेत्री दीया मिर्झाने ट्विटरवर शेअर केलाय. हा व्हिडीओ पाहून कळतं की, जंगलात दहशत कुणाची जास्त असते. यात हत्ती येताना पाहून वाघ कसा पळत सुटतो हे दिसतं.
व्हायरल झालेल्या व्हिडीओत बघायला मिळतं की, जंगलात दहशत पसरवणारा वाघ रस्त्याच्या मधोमध बसला आहे. याच रस्त्यावरून एक हत्ती येत आहे. वाघाला आधी हे माहीत नसतं की, मागून हत्ती येतो आहे. वाघ तोपर्यंत निवांत आराम करत रस्त्यावर बसला आहे. जसा वाघ मागे वळून बघतो त्याला एक मोठ्ठा हत्ती येताना दिसत. अशात वाघ जराही उशीर न करता तिथून पळ काढतो.
हत्तीचा रस्ता मोकळा होतो. पण वाघ अचानक घाबरून झाडांमध्ये धावत जातो हे बघून लोक हैराण झाले आहेत. हा व्हिडीओ लोकांना चांगलाच आवडला आहे. वाघाचा पळून जातानाचा हा व्हिडीओ व्हायरल झाला आहे. दीया मिर्झाने या व्हिडीओच्या कॅप्शनला लिहिले आहे की, 'बघा, शेवटी काय होतं'. या व्हिडीओला १ लाखांपेक्षा जास्त व्ह्यूज मिळाले आहेत.
IFS अधिकारी परवीन कस्वां यांनी लिहिले की, 'जसे मी नेहमीच सांगतो, हत्ती हा जंगलाचा स्वामी असतो'...कुणीही त्याच्या विरोधात उभं राहू शकत नाही'. लोकही या व्हिडीओवर भरभरून कमेंट करत आहेत.