MS Dhoni Autograph Fan Video: भारताचा माजी कर्णधार महेंद्रसिंग धोनीला आंतरराष्ट्रीय क्रिकेटमधून निवृत्त होऊन बराच काळ लोटला आहे. पण त्याचा करिष्मा आणि लोकप्रियता अजूनही कायम आहे. अजूनही जेव्हा IPL मध्ये चेन्नई सुपर किंग्जचा कर्णधार म्हणून धोनी फलंदाजीला येतो, तेव्हा स्टेडियम धोनी... धोनी... अशा घोषणांनी दणाणून जाते. चाहत्यांमध्ये अजूनही धोनीची तशातच पद्धतीची लोकप्रियता आहे. धोनी आता आपला बहुतेक वेळ क्रिकेटच्या मैदानापासून दूरच असतो. पण त्याच्या चाहत्यांशी त्याचे बंध अजूनही घट्ट आहेत हे सिद्ध करणारे काही व्हिडिओ सोशल मीडियावर अनेकदा फिरताना दिसतात. असाच आणखी एक व्हिडिओ आता इंटरनेटवर समोर आला आहे, त्यात धोनी त्याच्या टी-शर्टवर एका चाहत्याला ऑटोग्राफ देताना दिसत आहे.
व्हिडिओमध्ये धोनी चाहत्याच्या पांढऱ्या टी-शर्टच्या मागच्या बाजूला ऑटोग्राफ देताना दिसतोय आणि हा व्हिडीओ चांगलाच चर्चेत आहे. पाहा तो व्हिडीओ-
दरम्यान, MS धोनी IPL 2023 मध्ये दिसणार आहे. त्यासाठी खेळाडूंचा लिलाव २३ डिसेंबर रोजी होणार आहे. धोनी चेन्नई सुपर किंग्ज फ्रँचायझीचा यष्टीरक्षक फलंदाज आहे. तो संघाचे नेतृत्वदेखील करताना दिसणार आहे. IPL च्या पहिल्या हंगामापासून तो IPL चा भाग आहे. गेल्या दोन IPL पासून आगामी आयपीएल हे धोनीचे शेवटचे आयपीएल असे बरेचदा बोलले जाते. मात्र धोनी दरवर्षी नव्या जोमाने आणि ऊर्जेने पुनरागमन करतो व संघातील खेळाडूंमध्ये नवचैतन्य निर्माण करतो. सुपर किंग्सने लिलावापूर्वी स्टार वेस्ट इंडिज अष्टपैलू खेळाडू ड्वेन ब्राव्होला करारमुक्त केले आहे आणि त्याला त्यांच्या कोचिंग स्टाफमध्ये स्थान दिले आहे. त्यामुळे लिलावात चेन्नई संघ नक्की काय प्लॅनिंगसह उतरतो याकडे साऱ्यांचेच लक्ष असणार आहे.