सोशल मीडियावर असे काही व्हिडीओ व्हायरल होतात, जे लोकांच्या हृदयाचा ठाव घेतात. आपण सारेच आपल्या आई-वडिलांवर प्रेम करतात. त्यांच्यासाठी काहीही करायला मुलं तयार असतात. मुले मोठी झाल्यावर त्यांची स्वप्ने पूर्ण करतात. अनेकदा घरची परिस्थिती, जबाबदारी यामुळे पालक त्यांची हौस मौज करत नाहीत. परंतू, मुले ही नंतर पूर्ण करतात तेव्हा याच पालकांच्या चेहऱ्यावरील आनंद पाहण्यासारखा असतो.
आई-वडिलांनी आपल्यासाठी अनेक खस्ता खाल्लेल्या असतात. त्यामुळे त्यांचे आय़ुष्यच जगण्याचे राहून जाते. एका मुलाने काही महिन्यांपूर्वी महिंद्राची सर्वात भारदस्त असलेली कार एक्सयुव्ही ७०० घेतली. त्याचा आनंद त्याच्या आईच्या चेहऱ्यावर ओसंडून वाहू लागला होता. हा व्हिडीओ पाहून नेटकऱ्यांच्याही डोळ्यात अश्रूंची वाट मोकळी झाली होती.
या व्हायरल व्हिडीओमध्ये एक महिला लक्झरी कारच्या ड्रायव्हिंग सीटवर बसलेली आहे आणि शेजारच्या सीटवरील तिच्या मुलाशी बोलत आहे. कारमधील दृष्य पाहून तुम्हालाही समजेल ही कार कोणती आहे. प्रिमिअम कारमध्ये ती महिला साधी साडी नेसलेली आहे. रस्त्यावरून जाताना अनेक वाहने तिच्याजवळून गेली, त्या महिलेला गाडी चालवण्याचा अनेक वर्षांचा अनुभव असल्यासारखे वाटते.
हा व्हिडिओ शेअर करत मुलाने कॅप्शनमध्ये लिहिले की, 'माझी आई XUV 700 कार चालवत आहे.' साईकिरण कोरे या पेशाने फोटोग्राफर असलेल्या तरुणाने हा व्हिडीओ इन्स्टावर पोस्ट केल्या आहेत. या व्हिडीओला १८ लाखांहून अधिक लाईक मिळाले आहेत. हा त्याच तरुणाचा व्हिडीओ आहे ज्याने काही दिवसांपूर्वी या कारमध्ये हायवेवर अडास मोड ऑन करून मित्रांसोबत गेम खेळण्याचा व्हिडीओ टाकला होता.